A Deputación de Lugo vaise a FITUR con dúas revolucionarias apps de turismo
luns, 20 de xaneiro do 2020
O
presidente da Deputación, José Tomé Roca, xunto á deputada de
Promoción do Territorio e Turismo, Pilar García Porto, presentarán
as últimas novidades da entidade provincial en materia de innovación
turística o vindeiro xoves (23 de xaneiro) na nova edición da
feira FITUR que se celebra en Madrid. Estas novidades acompañan
a campaña Lugo,¡ven!, que
lles serve de marco referencial e no que a Deputación puxo todo da
súa parte para incrementar a pegada da provincia no mundo. A campaña
incluíu a posta en marcha de dúas novas aplicacións para
dispositivos móbiles que teñen como finalidade “difundir os
principais atractivos da provincia e mellorar a experiencia do
visitante”.
A
presentación das apps, que se desenvolverá no stand
de Galicia, estará moderada polo recoñecido meteorólogo lucense
Martín Barreiro, embaixador da provincia para o desenvolvemento de
accións de promoción e consolidación da marca turística Lugo
Cambia. Tamén participarán as alcaldesas de Lugo,
Lara Méndez, e Viveiro, María Loureiro, e a primeira tenente de
alcalde de Monforte de Lemos, Gloria Prada.
A
deputada de Turismo avanzounos que o obxectivo da campaña Lugo,
¡ven!, integrada na marca Lugo Cambia, é mellorar a
experiencia do visitante: “Queremos que quen recale na provincia de
Lugo garde un recordo agradábel da súa estadía, que a viva
intensamente e planifique a súa viaxe do mellor xeito posíbel”.
Co
obxectivo de lograr o devandito, a Deputación presentará a
aplicación móbil de balde Inventrip, que inclúe información
sobre uns 2.500 puntos de interese, incluídos elementos do
patrimonio cultural e natural, rutas, artesáns, bodegas, empresas de
turismo activo, restaurantes e establecementos turísticos. “Un
conxunto de información que permite ao visitante trazar unha ruta
para chegar aos lugares que máis lle interesan ou poder descubrir os
recursos que están máis preto da súa posición”, explicou a
entidade provincial.
A
outra ferramenta tecnolóxica que a Deputación presentará en FITUR
é Lugo 360, unha aplicación tamén de balde, que a través
das técnicas máis avanzadas de Realidade Aumentada permitirá facer
unha viaxe a 25 localizacións da provincia a través de calquera
dispositivo móbil. Esta ferramenta achega aos usuarios unha
contorna virtual que lles permite visitar de xeito envolvente e
innovador calquera dos catro xeodestinos da provincia de Lugo
(Ancares-Courel, A Mariña, Lugo-Terra Chá e Ribeira Sacra), co “fin
de motivalos a que fagan unha visita real”.
A
Deputada de Turismo remarcou a importancia de que a Deputación de
Lugo faga unha presentación propia en FITUR das potencialidades
turísticas da provincia. “É unha moi boa oportunidade para amosar
todos os nosos recursos e oportunidades, e forma parte da nosa
estratexia de impulso do turismo para xerar riqueza e emprego na
provincia”.
Tamén
lembrou que a institución provincial lucense destina nos orzamentos
2020 máis de 2,4 millóns de euros ao desenvolvemento turístico, co
fin de continuar mellorando “o moi bo número de visitas logrado no
último ano”.