A Deputación de Lugo reforza a comunicación do seu servizo de teleasistencia
martes, 17 de marzo do 2020
Ante
a ameaza do COVID-19 e as restricións e illamentos forzosos
derivados do estado de alarma decretado polo Goberno central e co
obxectivo de seguir dando o mellor servizo posíbel a persoas
maiores, a
Deputación de Lugo vén de fortalecer a comunicación do seu servizo
de asistencia, simbolizado co botón vermello de chamada. E faino
cunha campaña con recomendacións, medidas e cuestións a ter en
conta para contribuír a frear a propagación do coronavirus. En
total, serán obxecto deste fortalecemento na atención na
comunicación 1.302 persoas maiores da provincia.
A
campaña, entre outras cuestións, inclúe chamadas ás persoas
usuarias para lembrarlles que dispoñen dun teléfono de información
centralizado relativo á enfermidade, facilitarlles recomendacións
de hixiene e protección, e dar consellos adaptados a esta nova
situación aos seus coidadores. Ademais, farase un seguimento
específico no caso de que usuarios deste servizo tiveran que
realizar a proba do coronavirus, intensificando as chamadas para
comprobar a evolución da sintomatoloxía.
Por
outra banda, segundo informou a Deputación estableceuse un protocolo
de seguimento especial no caso de que usuarios e usuarias tivesen
que someterse a un illamento por posible diagnóstico de COVID-19.
Neste caso, explica a entidade, “farase un control telefónico
continuado, chamando de forma diaria durante 14 días para coñecer o
seu estado de saúde e comprobar se houbo unha mellora ou
empeoramento”.
O
presidente da Deputación, José Tomé, explicou que “queremos que
os nosos maiores non se sintan sós, teñan a información necesaria
sobre esta nova enfermidade e saiban que deben facer no caso de
sentir algún dos síntomas”.