A Deputación de Lugo presenta en FITUR a súa nova aposta polo audiovisual e as redes
xoves, 24 de xaneiro do 2019
O
presidente da Deputación de Lugo, Darío Campos Conde, presentou
hoxe en FITUR, o máis
referencial evento turístico do ámbito español, o novo spot
audiovisual feito pola entidade lucense para promover os moitos e
variados atractivos da provincia. A peza, que se pon a disposición
da comunidade de viaxeiros nas redes sociais e máis na web da
Deputación, www.deputacionlugo.gal,
forma parte da campaña de promoción Lugo Cambia, lanzada hai
dous anos. Lugo Cambia, que vai pola súa terceira fase, diríxese ao
pulo turístico da provincia. Ao longo da súa traxectoria xa xerou
sete vídeos en galego, castelán, inglés, alemán, francés,
italiano e portugués, todos eles nas redes sociais.
Segundo
lembrou Campos Conde en FITUR, Lugo Cambia xira sobre 3 eixos:
o cambio da provincia de recuncho a recuncho (2017); o cambio que
produce Lugo a quen a visita (2018) e os cambios nos sentimentos e
emocións que transmiten as citas lucenses máis senlleiras (2019).
Estes e outros datos foron dados a coñecer co gallo da presentación
na feira madrileña do novo vídeo da Deputación, Provincia
de Lugo: Moito por celebrar, que foi mostrado na compaña do
popular comunicador galego Martín Barreiro, embaixador da campaña
Lugo Cambia, e dos alcaldes dos principais concellos da
provincia polo seu número de habitantes: Lugo (Lara Méndez),
Viveiro (María Loureiro) e Monforte de Lemos (José Tomé Roca).
Tamén estivo na presentación o deputado de Turismo, Eduardo Vidal
Baamonde.
A
nova peza e as súas diferentes variantes en distintas linguas
atópanse como dixemos nas redes oficiais da Deputación e en
www.deputacionlugo.gal,
no apartado específico sobre turismo. Segundo informou a entidade
provincial, difundiranse a nivel internacional en reputadas
plataformas para dar a coñecer as festas, celebracións e citas
gastronómicas máis singulares e únicas da provincia así como os
recursos patrimoniais, naturais, culturais e históricos que rodean
estes encontros festivos “co obxectivo de atraer á provincia máis
visitantes para que experimenten momentos emocionantes e
inesquecíbeis”.
Campos
Conde subliñou que “hai dous anos, iniciabamos en FITUR a campaña
Lugo Cambia coa presentación, na que é a feira turística de
referencia no ámbito estatal, dos primeiros cinco traballos
audiovisuais cos recursos turísticos dos nosos 67 concellos, nunha
clara aposta pola promoción do conxunto da nosa provincia como un
destino turístico único. Hoxe, damos a coñecer novas iniciativas
de reforzo da nosa campaña de promoción da provincia, sendo unha
pequena mostra do que temos preparado para este 2019, cuxo obxectivo
é conseguir que máis xente nos visite e experimente as intensas
emocións que poden sentir nunha viaxe a Lugo ao deixarse envolver
pola autenticidade de centos de festas, que te cambian para sempre”.
Pola
súa banda, Martín Barreiro explicou que “dende o primeiro momento
no que me propuxeron participar neste marabilloso proxecto sentinme
honrado e ilusionado, pero non me imaxinaba naquel momento o
verdadeiramente intenso da aventura”. Segundo fixo saber, relatando
a súa experiencia propia, “a viaxe pola provincia de Lugo é unha
viaxe polos sentimentos, unha viaxe polos recordos, e, para gran
sorpresa para min, unha viaxe chea de descubrimentos, encontros
festivos e intensas emocións”.
A
campaña Lugo Cambia enmárcase no primeiro Plan Estratéxico
de Turismo, unha estratexia “totalmente participativa” elaborada
pola Executivo provincial. A campaña recibirá en 2019 novos folgos
ao tempo que se prevé fortalecer a colaboración da entidade que
preside Darío Campos co sector turístico, desenvolvendo máis e
novas iniciativas.
Polo
que se refire a FITUR, é o principal referente de acontecementos
turísticos do ámbito estatal. De feito, na pasada edición reuniu
preto de 245.000 persoas de 165 países entre profesionais,
xornalistas e público en xeral. Durante a celebración de FITUR, a
provincia de Lugo estará presente no stand de Turgalicia
(pavillón 9) a través do que haberá contacto directo con
turoperadores, representantes do sector turístico e medios de
comunicación, co obxectivo “de transmitir os atractivos da
provincia lucense”.