A Deputación de Lugo mobiliza 76 dinamizadores para loitar contra a fenda dixital por idade
martes, 9 de decembro do 2014
A Deputación de Lugo, amais da
segunda fase de InnovaTE, está a pór en marcha esta semana
outra iniciativa dirixida a facilitar que haxa máis uso natural das
novas tecnoloxías onde antes non había, ou onde antes era
incompleto. Falamos de Sempre en activo, un programa da
Deputación dirixido desta volta aos maiores da provincia e
no que van participar até 76 dinamizadores promovendo o uso das
novas ferramentas entre os veciños que teñan máis de 55 anos.
As actividades, directamente encamiñadas a contrarrestar a fenda
dixital por idade (a que separa, por nivel de uso, ás novas
xeracións dos nosos maiores) abrangueran todos os concellos da
provincia e desenvolveranse a través da Fundación TIC, cuxa sede
principal é o Centro de Innovación Social InLugo.
Alí, segundo explica a Deputación, os devanditos
profesionais levarán a cabo accións de índole variada e
especialmente programadas para que as persoas maiores aumenten a súa
autonomía e melloren as súas capacidades cognitivas e funcionais a
través das novas ferramentas. A iniciativa insírese no compromiso
da Deputación “por corrixir as desigualdades entre todos os
lucenses para que poidan acceder ao meirande número posíbel de
actividades e recursos relacionados coas novas tecnoloxías,
contribuíndo á comunicación e ao intercambio de ideas como
mecanismos para aumentar a calidade de vida”.
As actividades realizaranse de xeito individual ou
colectivo, tanto en centros socioculturais, como nos propios fogares
dos usuarios, empregando para isto diversos medios tecnolóxicos,
como computadores, dispositivos móbiles ou mesmo consolas de
videoxogos. Tanto este programa como a segunda fase de InnovaTE están
cofinanciadas nun 80% por fondos europeos a través do Innova-TE2.