A Deputación de Lugo e o CB Breogán visualizan na Rede o labor da Cruz Vermella
mércores, 14 de novembro do 2018
A
Deputación de
Lugo e o CB Breogán están a pechar fileiras arredor da Cruz
Vermella: mostrando o seu importante labor social, humanitario e
solidario e, sobre todo, buscando novos apoios para seguir impulsando
este labor. Con este motivo, Deputación e Breogán comprometéronse
para que o vindeiro partido do club sexa adicado a pór en valor o
traballo da organización. Estes apoios vanse materializar, tamén,
en cuñas, pezas audovisuais e informacións a difundir nos espazos
en liña das ditas entidades, sendo o foco principal de contidos a
web do club celeste, www.cbbreogan.com,
e as redes sociais nas que ten presenza.
A
iniciativa foi presentada hoxe polo deputado de Deportes, Pablo
Rivera Capón, a deputada de Promoción Económica e Social, Sonsoles
López Izquierdo, o presidente da Cruz Vermella en Lugo, Luís
Abelleira Mayor e o director deportivo do CB Breogán, Enrique
Fernández Fraga. Trátase, segundo fixeron saber, “dunha unha nova
campaña de concienciación social, enmarcada dentro do contrato de
patrocinio asinado polo club celeste e a Deputación”.
Nun
plano máis concreto, a iniciativa consistirá nun partido (o deste
domingo) cun importante compoñente solidario. “Queremos aproveitar
esta cita deportiva como un medio de activación social, para
sensibilizar aos milleiros de seareiros que seguirán o encontro e
comprometelos no importante labor humanitario que esta organización
realiza na nosa provincia”, sinalou López Izquierdo, engadindo que
“dende o Executivo provincial consideramos que a acción solidaria
desta ONG é fundamental para ter unha sociedade máis xusta e
inclusiva, e para protexer e axudar ás persoas máis vulnerábeis”.
Durante
o encontro que o CB Breogán disputará o domingo, ás 16:00 horas,
no Pazo dos Deportes contra o Tecnyconta Zaragoza, difundiranse cuñas
e spots para mostrar á sociedade lucense e galega o labor da
organización, que terá tamén á súa disposición as instalacións
do edificio para instalar puntos de información.
Como
dixemos, desde hoxe e ao longo de toda a semana, o club celeste
adicará un recanto dixital específico na súa web oficial para
promover entre os afeccionados os distintos programas nos que
traballa Cruz Vermella.