A Deputación de Lugo achega aos concellos novos servizos tecnolóxicos e xurídicos
martes, 3 de febreiro do 2015
A Deputación de Lugo segue a traballar en fornecer
ás administracións locais da provincia novas prestacións
tecnolóxicas e xurídicas para axilizar a súa actividade. A través
de CooperaTIC, iniciativa do InnovaTE, o
organismo provincial ofrece aos 49 municipios incluídos en dito
programa europeo a adquisición e instalación dun novo sistema
software, a elixir polas entidades locais, por un valor máximo
de 10.000 euros. Asemade, dende a área de Cooperación e Asistencia
ós Concellos, o organismo lucense puxo a disposición de 67
municipios o acceso a unha completa base de datos xurídicos,
“aforrándolles os 4.000 euros que suporía a cada entidade a súa
compra”.
Segundo sinala a Deputación, a listaxe de
actividades que se facilitan dende CooperaTIC son moitas e
variadas. Por exemplo: módulos de interoperabilidade coa factura
electrónica; aplicacións de contabilidade ou de xestión
administrativa; ferramentas de deseño, de xestión de redes sociais
ou comunicación; programas de seguridade e antivirus; solucións de
almacenamento na nube, etc. Para solicitar estes servizos ou pedir
máis información, a Deputación habilita os números 982 260
110/982 260 105/ 982 260 135, e o enderezo electrónico
innovate@deputalucionlugo.com. O obxectivo da institución luguesa “é
reforzar as prestacións tecnolóxicas aos municipios logo de datos
de sede electrónica, páxinas web, sistemas operativos, paquetes
ofimáticos ou novo equipamento”.
A maiores, como dixemos, a Deputación está a
fornecer a todos os concellos lugueses “dunha completa base de
datos xurídicos na que poden consultar toda a lexislación
debidamente actualidade ou a colección da xurisprudencia existente”.
Coas claves correspondentes, que as administracións locais deben
solicitar ao organismo provincial, poden acceder á base de datos
dende deputacionlugo.gal
e seguindo a ligazón Servizos en liña para os Concellos. No
portal, amais de base de datos xurídicos, os municipios contan con
servizos de asistencia en materia económica-financeira, urbanística,
recursos humanos, contratación ou medio ambiente.