A Deputación de Lugo achega 48.000 euros a Trabada para a creación dun centro de novas tecnoloxías
venres, 20 de outubro do 2023
O
presidente da Deputación de Lugo, José Tomé Roca, asinou este
venres 20 de outubro coa alcaldesa de Trabada, Mayra García
Bermúdez, tamén deputada de Economía, Recadación, Facenda e
Especial de Contas, un
acordo a través do cal a institución provincial achega ao Concello
mariñán 48.000€ para a creación dun centro de novas tecnoloxías
en Vilaformán, rehabilitando o antigo teleclub da parroquia.
José
Tomé explicou que o investimento provincial supón un 90% do custe
total da actuación que permitirá a posta en marcha dun espazo
innovador impulsado pola propia alcaldesa. “O centro prestará
atención á veciñanza da parroquia, pero tamén de todo o concello
e axudará a dinamizar a vida social e económica con acceso ás
novas tecnoloxías no rural”, explicou Tomé, engadindo que os
traballos para crear un centro de novas tecnoloxías en Vilaformán
consistirán na retirada da rede eléctrica e os equipos de
iluminación, a demolición de tabiques, pavimentos e revestimentos
interiores e na retirada da carpintería de madeira existente.
Grazas
ao proxecto habilitaranse no edificio, de 131 metros cadrados, dous
espazos, un para instalar material informático e o segundo para
levar a cabo formación relacionada con actividades no rural, clases
de primeiros auxilios, ximnasia ou cursos informativos.
Este
acordo súmase aos investimentos que a Deputación de Lugo fai no
concello de Trabada. Dende 2019 a institución provincial destinou
3M€ para actuacións que contribúen á mellora da calidade de vida
dos trabadenses e dinamizar a economía local, así como para o
funcionamento do Centro de Atención a Maiores.