A Deputación da Coruña modifica un proceso selectivo para técnico superior de Informática logo dun recurso do CPEIG
mércores, 1 de febreiro do 2017
- Fernando Suárez, presidente do CPEIG
O Colexio Profesional de Enxeñaría
en Informática de Galicia (CPEIG) interpoñía o pasado maio de 2016
un recurso contra a Deputación da Coruña para modificar a Relación
de Postos de Traballo (RPT) na que figuraba o proceso selectivo para
elaborar unha listaxe de “aspirantes a nomeamentos e/ou
contratacións de persoal laboral temporal para postos de Técnico/a
Superior de Informática”. Finalmente
a entidade provincial vén de darlle a razón ao colexio profesional
e de modificar a devandita Relación de Postos de Traballo.
Como lembraremos, a razón
principal deste recurso foi que nas bases se fixaba como requisito
unha serie de titulacións como: Psicoloxía, Socioloxía, Dereito,
Publicidade e Relacións Públicas, Xornalismo ou Económicas,
titulacións que “nada teñen que ver coa Informática e o bo
desempeño do posto ofertado”, sinalou no seu día o colexio que
preside Fernando Suárez.
Perante este panorama, o CPEIG
solicitou no seu día que “estime e acorde establecer coma
requisito estar en posesión unicamente do título de enxeñeiro en
Informática, eliminando o resto de titulacións sen ningunha
conexión cos postos ofertados”, como así foi finalmente.
Lembrar que o recurso presentado o
26 de maio sinalaba o seguinte: “Parecería absolutamente
disparatado pensar que para deseñar unha ponte se ofertase un posto
no que se admitise un licenciado en Dereito ou un xornalista. Pois
exactamente iso é o que está facendo nesta convocatoria, tendo en
conta que na actualidade os sistemas informáticos se ocupan de
cuestións estratéxicas e de importancia vital para as persoas, polo
que non poden ser deixados en mans de xente que non estea abondo
preparada”.
A xeito de conclusión, co recurso
interposto polo CPEIG, esta entidade pretendía dúas cousas: a
representación exclusiva da profesión e a defensa dos intereses
profesionais dos titulados/as, amais de exercer a representación que
establezan as leis para o cumprimento dos seus fins e a defensa desta
profesión.