A Deputación da Coruña loce xeodestinos nas redes sociais
luns, 6 de agosto do 2018
A
actividade turística xa rebordou hai tempo os límites tradicionais
do turismo. Agora, hai un antes, un durante e un despois nas redes.
En
base a isto, a Deputación de Coruña vén de pór en marcha unha
campaña promocional audiovisual para animar a visitar a media ducia
de xeodestinos que acubilla. A estratexia vén da man da área de
Turismo da entidade provincial e baséase en parte en preparar o
terreo para acadar a meirande cantidade de gústame (like)
nas redes sociais. Inclúese
un vídeo xeral e outros específicos para cada un dos destinos, tal
e como se pode ver xa no YouTube. A difusión lévase a cabo nas
principais canles-comunidades de comunicación en liña: Facebook,
Twitter, YouTube e Instagram.
Coruña
Like é o título da nova campaña, coa que se queren visualizar
ao máximo os múltiples atractivos da provincia, poñendo o foco na
paisaxe, no patrimonio e na gastronomía, que se difunden na Rede co
cancelo #coruñalike.
No
material audiovisual xenérico, unha visitante promove as distintas
experiencias e paisaxes dándolle gústame nas redes sociais.
Promover esta acción, segundo informa Turismo da Deputación, é un
dos obxectivos da nova campaña, ou sexa, “conseguir que a xente se
faga eco e difunda a beleza e a oferta de calidade dos distintos
destinos da Coruña”. Ademais do vídeo xeral, a campaña inclúe
seis curtas particulares dedicadas a Ferrolterra, A Coruña e As
Mariñas, Costa da Morte, Terras de Santiago, Ría de Muros e Noia e
Ría de Arousa Norte.
Os
vídeos difundiranse nas redes sociais, na páxina de Turismo da
Deputación (https://turismo.dacoruna.gal)
e nas dos entes de xestión dos distintos xeodestinos.
Coruña
Like quere mostrar “a ampla variedade de experiencias para facer da
viaxe unha vivencia que se quererá compartir”, explica a
Deputación. Entre os elementos que se visualizan e se destacan
figuran a torre de Hércules e o porto da Coruña, a fervenza do
Ézaro e o cabo Fisterra na Costa da Morte, o monte Louro e o castro
de Baroña na ría de Muros e Noia, a praza do Obradoiro nas Terras
de Santiago, e o cabo Ortegal ou o mosteiro de Caaveiro de
Ferrolterra.
A
nova campaña audiovisual pódese atopar tamén na páxina web da
área de Turismo da Deputación da Coruña que está a funcionar como
plataforma interactiva de promoción dos distintos destinos e
ferramenta para os concellos.