A Deputación da Coruña impulsa unha ferramenta online para radiografar a realidade dos concellos
venres, 8 de maio do 2020
A
Deputación da Coruña vai botar man das máis avanzadas tecnoloxías
de análise e seguimento para ter información puntual e exhaustiva
sobre a realidade socioeconómica da provincia. Este
será o cometido do Barómetro Socioeconómico Local (BSL), que,
segundo fixo saber a entidade provincial, “medirá a evolución
temporal e territorial do mercado laboral, a evolución demográfica
e máis a economía de cada municipio”. O desenvolvemento da nova
ferramenta tecnolóxica online, que se vai integrar cos máis
de 4,5 millóns de datos sobre infraestruturas e servizos locais xa
dispoñíbeis na EIEL (Enquisa de Infraestruturas e Equipamentos
Locais) da Deputación, vén de saír a licitación. O resultado
deste labor de análise porase a disposición da cidadanía.
En
palabras do presidente da entidade provincial, o Barómetro
recollerá, “de xeito simple e intuitivo”, datos compilados de
fontes oficiais e amosará mediante gráficos e mapas interactivos a
situación actual e a evolución temporal e territorial de
indicadores relativos ao mercado laboral, a evolución demográfica,
a economía e competitividade, a cohesión social... así como datos
do catastro, urbanismo e vivenda, transporte ou xestión económica
do sector público. O presidente Valentín González Formoso
salientou “utilidade” desta información á hora de planificar
investimentos ou deseñar políticas efectivas para a dinamización
económica de cada territorio.
Amais
do devandito, posibilitará a realización de informes, pirámides de
poboación ou mapas temáticos que faciliten unha comparación
sociométrica de distintos concellos ou comarcas, ofrecendo unha
perspectiva da súa evolución ao longo do tempo.