A Deputación da Coruña forma ao persoal dos concellos para a adaptación electrónica á nova lei de contratación
mércores, 27 de xuño do 2018
A
Deputación
da Coruña está a desenvolver accións formativas para que o persoal
dos concellos sexa quen de adaptarse electronicamente á nova Lei de
Contratación. Estas accións, nas que están a participar máis
de 200 persoas, está dirixida aos traballadores técnicos das
administracións locais., en especial responsábeis das secretarías
e das mesas de contratación O deputado de Contratación e
Patrimonio, Xesús Soto, inaugurou onte a primeira das edicións do
curso. Segundo fixo saber, “a Deputación da Coruña vai estar ao
carón dos concellos para que o paso da contratación en papel á
electrónica sexa o menos traumático posíbel”.
O
deputado sinalou tamén que, coa aplicación do novo marco legal, os
servizos da Deputación teñen a obriga de preservar o cumprimento da
tramitación electrónica nos proxectos que integran plans
provinciais e emitir informes desfavorábeis a aqueles que se
financian con fondos da institución e non cumpren o estipulado pola
lei. “A lei”, dixo, “promoveuse como máis áxil e accesíbel,
e díxose que facilitaba o acceso de pequenas e medianas empresas
mais estase a comprobar que a tramitación é máis complicada e
nalgún dos concursos presentáronse menos da metade de licitadores
dos que se presentaban con anterioridade”.
O
obxectivo dos cursos de formación, polo tanto, é que os concellos
consigan adaptarse o antes posíbel ao novo modelo de Administración
Electrónica e así “evitar adiamentos ou outro tipo de prexuízos
nos procesos de contratación”.
O
programa iniciouse no IES Calvo Sotelo da Coruña co comezo do
primeiro dos cursos que terán continuidade en novas edicións os
días 5, 10, 12 e 17 de xullo. Cada acción formativa trátase dun
curso práctico en que as/os asistentes achéganse ás principais
características e o funcionamento da Plataforma de Contratos do
Sector Público, á xestión dos órganos de asistencia e ao
funcionamento dos novos modelos de licitación, publicación ou envío
de comunicacións e resolucións.