A Deputación da Coruña e Abanca achegan app para permitir o pago de impostos locais co móbil
luns, 9 de novembro do 2015
A
entidade financeira galega Abanca e a Deputación da Coruña
presentaron esta mañá unha aplicación para dispositivos destinada
a permitir o pago de impostos locais a través do noso aparello
móbil. A ferramenta foi dada a coñecer nun contexto máis amplo: o
contexto da formalización do acordo para a nova andaina do Plan
Activamos, unha iniciativa conxunta a través da cal Abanca
destinará 87 millóns de euros a financiar proxectos de pulo
económico e social na provincia (segundo fixeron saber as dúas
entidades, “cun incremento do 20% con respecto á edición do
pasado”). No acto de sinatura participaron o deputado de Economía
Antonio Leira, e o director de Banca Institucional de Abanca,
Santiago Novoa.
Segundo
fixeron saber o organismo provincial e a entidade financeira, a nova
aplicación que a Abanca vén de deseñar xa está dispoñíbel tanto
para dispositivos con Android como para aparellos con iOS, co nome de
“Deputación da Coruña”. Esta iniciativa, explicouse na rolda de
prensa, “busca facer máis doado e accesíbel o pago dos impostos
aos cidadáns co emprego das novas tecnoloxías, poñendo para iso á
súa disposición canles cunha operatividade de 24 horas ao día os
sete días da semana”.
A
aplicación, máis polo miúdo, permite o pago de taxas locais de
xeito “rápido e sinxelo” e en “dous cómodos pasos”.
Primeiro elíxese como se introducen os datos do recibo (facendo unha
foto coa cámara do móbil ao código de barras, introducindo os
números do código de barras ou escribindo os datos do recibo) e,
despois, hai que teclear os datos do cartón de crédito para
efectuar o pago. Co obxectivo de axilizar a introdución de datos,
tanto da tarxeta como do recibo, a ferramenta permite engadilos
facéndolles unha foto coa cámara do móbil. A aplicación conta,
ademais, cun asistente que axuda ao usuario a formalizar o pago de
recibos guiándoo en todo o proceso. Este tipo de pago a través da
ferramenta é de balde, “sen ningún tipo de comisión”. O seu
deseño insírese ao abeiro da estratexia de Abanca de facilitar o
desenvolvemento tecnolóxico no seu ámbito de actuación para poder
“ofrecer un servizo omnicanle, innovador e con altos niveis de
calidade”.
Noutra
orde de cousas, sinalar que no transcurso da presentación as dúas
entidades indicaron que través do Plan Activamos, a entidade
bancaria vai seguir financiando, “en condicións preferentes con
respecto ás estándar do mercado”, proxectos relacionados coa
formación, a accesibilidade das vivendas, a extensión das novas
tecnoloxías, a eficiencia enerxética, o emprendemento e a creación
de emprego. Lembraron que os produtos de financiamento do Plan
Activamos “contan con tipos de interese bonificados en relación a
oferta bancaria actual e sen bandas de fluctuación, e que, ademais,
carecen de comisións de apertura, estudo, amortización ou
cancelación anticipada, dispoñendo de amplos prazos de
amortización”.
Até
o de agora (e tamén de agora en adiante), PEME, microempresas,
comerciantes e autónomos foron os principais beneficiarios dos
créditos do Plan Activamos. En total, tramitáronse con estes
segmentos 2.652 operacións.