A Deputación da Coruña abrirá puntos de atención presencial para axudarnos nos trámites electrónicos
mércores, 15 de marzo do 2023
A
Deputación da Coruña, a través dun novo plan de capacitación e
impulso tecnolóxico (a Estratexia Dixital da entidade provincial),
habilitará oficinas de atención presencial para facilitar á
cidadanía os seus trámites electrónicos coas administracións. As
localidades da Coruña e Betanzos contarán cos primeiros puntos de
atención piloto, que contarán con persoal cualificado en
Administración Dixital. Estas e outras medidas da Estratexia
Dixital foron presentadas este martes 14 de marzo polo presidente
provincial Valentín González Formoso.
O
obxectivo desta folla de ruta, dixo, “é que a Deputación siga
liderando a transformación dixital na provincia, afondando na
inclusión tecnolóxica e aproveitando as oportunidades que supoñen
tecnoloxías emerxentes como a Intelixencia Artificial, o Big Data
ou os servizos na nube”
De
feito, lembrou que “o último informe do Consello de Contas sitúa
a entidade provincial coruñesa á vangarda na implantación da
Administración Electrónica en Galicia”. E engadiu: “Esa
posición de liderado non é casualidade, é froito de anos de
traballo e dunha aposta clara e constante deste Goberno para que a
administración dixital sexa unha realidade e chegue a todos os
concellos e a toda a cidadanía da provincia".
Na
presentación da estratexia, Valentín González Formoso, compareceu
en rolda de prensa xunto ao deputado de Economía e Facenda, Antonio
Leira, e os responsábeis técnicos do servizo para presentar a
Estratexia Dixital. Segundo explicou o presidente, a folla de ruta
baséase en catro eixes: a accesibilidade dixital universal, a
ciberseguridade, a mellora das infraestruturas dixitais e o proxecto
Concello Dixital, que xa chega a 80 entidades da administración
local da provincia.
Formoso
explicou que a Deputación leva investido máis de 16 millóns de
euros nos últimos cinco anos para impulsar a eAdministración tanto
na Deputación coma nos concellos coruñeses “co obxectivo
fundamental de achegar a administración á cidadanía, facilitar
calquera trámite e axilizar a tramitación de expedientes”. Este
proceso, engadiu, supuxo “un importante aforro económico para a
cidadanía, que a Deputación da Coruña estima en 50 millóns de
euros”. O presidente sinalou tamén que, a través da Oficina do
Dato, e no marco dunha estratexia europea, a Deputación traballa
actualmente no aproveitamento das novas oportunidades que supoñen as
tecnoloxías emerxentes como a Intelixencia Artificial, o Big
Data, a Internet das Cousas (IoT) ou os servizos na nube, que
proporcionan "maior eficiencia, anticipación e axilidade na
tramitación".
As
oficinas
Formoso
destacou que unha das liñas de acción da Estratexia Dixital da
Deputación é “combater a fenda dixital para garantir que todo o
mundo, incluíndo as persoas máis maiores ou as que carezan de
coñecementos, recursos ou aparellos dixitais, poidan acceder en
igualdade de condicións aos beneficios da Administración
Electrónica”. Para fomentar a inclusión tecnolóxica, dixo,
“abriremos puntos de atención presencial sen cita previa onde
todas as persoas que o precisen podan acceder a calquera servizo
dixital da administración pública co apoio de persoal cualificado”.
Segundo engadiu, “non só porán o foco nos trámites relacionados
coa Deputación da Coruña, senón nos de calquera outra
administración", explicou Formoso, que avanzou que a idea do
Goberno provincial é "replicar despois a iniciativa noutros
concellos que así o demanden coa súa colaboración". Do mesmo
xeito, a Deputación seguirá potenciando a formación en
competencias dixitais da cidadanía e dos empregados públicos de tal
forma que melloren a súa adaptación á nova sociedade dixital.
Ciberseguridade
e infraestruturas dixitais
Valentín
González Formoso destacou que outro dos retos da Administración
provincial é a ciberseguridade. "A Deputación leva desde 2015
traballando na adecuación dos seus sistemas informáticos ao Esquema
Nacional de Seguridade, que proporciona ao sector público un marco
de acción común para facer fronte ás ciberameazas" e é,
dixo, "unha das tres primeiras deputacións de España con catro
sistemas certificados polo Centro Criptográfico Nacional". Ao
fío do devandito, destacou que a Deputación conta co seu propio
Plan de Ciberseguridade e cunha oficina técnica para apoiar os
concellos neste eido e axudalos a conseguir a certificación dos seus
sistemas no ENS, así como para seguir adecuando os sistemas da
Deputación a este protocolo nacional.
Infraestruturas
e Concello Dixital
Pola
súa banda, o deputado Antonio Leira explicou que no eido das
infraestruturas dixitais, a Deputación investiu preto de 2,6 millóns
nos últimos anos en adquirir equipamentos e infraestruturas para
mellorar a dixitalización dos concellos e da propia Deputación,
creando “un ecosistema dixital resiliente e con capacidade para os
novos servizos e canles dixitais”. Leira explicou tamén que a
Deputación investiu máis de 12 millóns de euros para impulsar o
plan Concello Dixital, a aposta do Goberno provincial para fomentar o
uso da Administración Electrónica nos concellos, que suma xa 80
entidades locais adheridas.