A Coruña bota man das TIC para ter informada á cidadanía do nivel de ocupación das praias
martes, 16 de xuño do 2020
O
Concello
da Coruña vai empregar novas tecnoloxías para controlar o acceso ás
praias e evitar aglomeracións. En concreto, tirará proveito dun
software que achegará información da capacidade real de cada areal
ao longo do día dependendo das mareas, subministrando en cada intre
datos actualizados sobre o aforamento axeitado de cada espazo
costeiro. Este programa, unido á rede de cámaras que están a ser
habilitadas, permitirá coñecer en tempo real a ocupación de todo
litoral, posibilitando tomar as medidas oportunas respecto da
afluencia de bañistas. O Concello comezou este luns 15 de xuño a
instalar os sistemas de control.
Esta
medida forma parte do novo plan de seguridade e continxencia que o
Concello activou para evitar aglomeracións nos areais e asegurar que
as e os bañistas cumpren as medidas de seguridade e distancia social
impostas por mor da COVID-19. O Goberno local confía en que o
sistema tecnolóxico estea listo para cando as condicións
climatolóxicas permitan achegarse aos areais, unha vez remate a
influencia das baixas presións coa que comezamos esta terceira
semana de xuño.
En
termos máis concretos, a iniciativa consiste nuns “arcos de gran
amplitude” que levan incorporados uns sensores de paso que
contabilizan ás persoas que entran e saen das praias e que levan
conectados un semáforo que sinaliza en tempo real a capacidade de
cada espazo litoral de lecer: a cor verde indica que hai espazo
suficiente, ámbar, que a capacidade comeza a completarse, e vermello
que a capacidade está completa.
Instalaranse
14 puntos de control de accesos: 4 na praia de Riazor, 4 no Orzán, 2
en Matadoiro, 1 en As Lapas, 2 en Santo Amaro e 1 na praia de Oza.
A
través destas tecnoloxías, o Concello informará en cada intre da
capacidade das praias mediante uns paneis situados en distintos
puntos da cidade e, tamén, dunha web de Medio Ambiente que se poderá
consultar desde o móbil a través dunha ligazón ou dun código QR.