A Coruña acolle o día 23 a presentación de 21 proxectos audiovisuais galegos ante profesionais de todo o Estado
xoves, 15 de novembro do 2012
- O centro Ágora de A Coruña, sede da actividade do CLAG
O Clúster Audiovisual Galego (CLAG)
celebrará a sétima edición da xornada de traballo I+P, Ideas
para producir o vindeiro 23 de novembro no Edificio Ágora de A
Coruña, marco elixido para dar conta, en todo detalle, dun total de
21 proxectos audiovisuais de creadoras/es da nosa terra, que serán
presentados polas produtoras ou ben polos seus responsábeis a título
particular. Na outra beira da actividade, unhas 30 canles de
televisión estatais e autonómicas (públicas e privadas), axentes
de distribuidoras e produtores executivos xuntaranse na xornada do
CLAG para informarse dos proxectos audiovisuais galegos. De feito, o
encontro está pensado para favorecer a distribución, a compra ou a
co-produción das nosas achegas.
O CLAG organiza esta xornada de
exposición de proxectos e entrevistas one to one en colaboración co
Instituto Galego de Promoción Económica (IGAPE) e o Concello de A
Coruña. Tamén colaboran as empresas Music Library, Martín Codax,
LAG (Localizacións Audiovisuais de Galicia) e o Máster en Produción
e Xestión Audiovisual (MPXA).
O encontro será inaugurado polo
presidente do cluster, Andrés Barbé, e máis polo director
de Galicia@World do IGAPE, Alfredo Castro. A continuación, e xusto
antes da sesión de presentación dos proxectos, celebrarase unha
mesa redonda, Beneficios de rodar nas cidades,
na que participan Carlos Rosado, presidente da Spain Film Commision,
e Piluca Querol, directora da Andalucía Film Commision. Pola tarde,
terán lugar os encontros one to one entre os responsables dos
proxectos presentados e os potenciais compradores.
Na xornada anterior, o xoves día 22,
os responsables de canles de televisións, axentes de distribuidoras
e produtores executivos participarán na xira A Coruña
Cinematográfica, actividade que busca salientar os beneficios
que reportan as rodaxes nas cidades e as posibles estratexias de
promoción e explotación existentes, como pode ser o turismo
cinematográfico. A continuación, asistirán no Teatro Colón de A
Coruña á premiere do filme Invasor, dirixido
por Daniel Calparsoro, e producido por Vaca Films e Morena Films.