A Comisión Europea imponlle unha multa millonaria a Intel
mércores, 13 de maio do 2009
A Comisión Europea, que a raíz de varias
queixas presentadas por ADM iniciou unha investigación da actividade comercial
de Intel por suposta competencia desleal, vén
de impoñerlle ao grupo informático estadounidense unha multa récord de 1.060
millóns de euros, a maior da historia da UE, por abusar da súa posición
dominante para así tratar de expulsar aos seus rivais do mercado de
microprocesadores, especialmente a AMD.
Ao parecer, Intel recorreu a prácticas
que Bruxelas considera “ilegais”,
tales como aplicar fortes descontos e incluso pagar a fabricantes de
ordenadores como Acer, Dell, HP, Lenovo ou NEC para que non empregasen
microprocesadores da súa competencia.
Segundo veñen de afirmar os responsables
da sanción, a empresa estadounidense tamén pagou ao distribuidor Media Markt “para que vendera só ordenadores equipados
con microprocesadores Intel” polo que o executivo comunitario esixe o “cese inmediato destas prácticas”.
A sanción de 1.060 millóns de euros
representa o 4,15 por cento do volume de negocios de Intel en 2008 e supón
menos da metade do máximo que podía impoñer a UE para este tipo de casos (o 10
por cento do volume de negocios da empresa multada) polo que o xigante
tecnolóxico pode dar grazas porque o executivo comunitario non fose máis
severo.
Ata o de agora, a multa máis alta que
impuxera a Comisión Europea por este tipo de abusos de posición dominante era a
de Microsoft en 2004, que ascendeu a 497 millóns de euros, unha cifra que non
chega nin a metade da imposta a Intel polas súas infraccións, que se extenderon
no tempo entre o 2002 e o 2007.
O executivo comunitario considera que, ao
reducir a capacidade dos seus rivais para competir baseándose na calidade dos
seus produtos, a actuación de Intel “danou
gravemente a competencia e a innovación”.
Pola súa banda, a comisaria de
competencia, Neelie Kroes, vén de afirmar que “Intel perxudicou a millóns de consumidores europeos durante anos” e
tacha esta infracción de “intolerable”.
O grupo informático, que non cre ter
infrinxido a lexislación europea coa súa práctica, xa anunciou que recurrirá a
multa e que mentres dure o procedemento de apelación, colaborará co ejecutivo
comunitario para “correxir as actuacións
que Bruxelas considera ilegais”.