A Cidade da Cultura e seis contadoras xuntan forzas nun club virtual de contos orais: o Club das Lerchiñas
mércores, 6 de maio do 2020
A
cultura, en tempos de COVID-19, peta na nosa porta. E non só a
cultura, senón tamén algunhas das súas irmás máis
célebres: a imaxinación, a creatividade, o lecer, a lingua e a
confraternidade. Estes e máis o poder das novas tecnoloxías da
comunicación para sortear confinamentos e limitacións son
os ingredientes do Club das Lerchiñas, unha iniciativa impulsada
pola Cidade da Cultura de Galicia para que ningunha nena nin neno
fique estes días sen o seu relato oral achegado por algunhas das
máis experimentadas e senlleiras contadoras da nosa terra, entre as
que se contan María Lado & Lucía Aldao, Bea Campos, Andrea
Bayer, Paula Carballeira e Ledicia Costas. O Club das Lerchiñas
forma parte da campaña #aculturasegue e desenvólvese nas redes
sociais e na páxina web da Cidade da Cultura.
A
iniciativa botará a andar o vindeiro 9 de maio e contará cunha
emisión en liña todos ós sábados ata o 6 de xuño. A idea é que
a devandita media ducia de contadoras lles acheguen ás familias, a
través de Internet, “historias sinxelas e amenas, baseadas na
tradición oral e tamén contos da súa propia autoría”, explican
dende a Cidade da Cultura, engadindo que a actividade forma parte da
programación online do complexo do Gaiás para brindar unha
completa oferta cultural durante a crise sanitaria motivada pola
COVID-19.
- A contadora Bea Campos forma parte da iniciativa
O
Club das Lerchiñas arranca coa sesión de María Lado & Lucía
Aldao, expertas en narración oral e en contos para a rapazada, que
adaptan a contanconto a súa coñecida historia de Po e Xía.
Seguiralle ao sábado seguinte, o 16 de maio, Bea Campos cunha
versión do conto tradicional A princesa e o chícharo.
O
sábado 23 de maio, Andrea Bayer estará acompañada polo monicreque
Roque para facer chegar en liña desde a súa casa unha historia
propia.
A
seguinte sesión terá como protagonista o 30 de maio a Paula
Carballeira e a súa historia Un conto con miga e codia.
Pechará
o Club das Lerchiñas o sábado 6 de xuño a escritora Ledicia Costas
co seu conto Conexión macarrón.