A Catedral de Santiago presenta exposicións virtuais sobre o Pórtico da Gloria en Google Arts & Culture
luns, 20 de xullo do 2020
As
ligazóns da Catedral de
Santiago co máis avanzado do universo online non paran de
fortalecerse. Segundo informan dende a fundación responsábel da
xestión e conservación templo compostelán, dende este 20 de xuño
están dispoñíbeis
en Google catro novas exposicións desenvolvidas pola entidade, desta
volta poñendo o foco no Pórtico da Gloria. Esta iniciativa é
froito dunha colaboración entre a fundación e o coñecido buscador
de Internet que se remontan ao ano 2017: un programa de traballo
conxunto que permitiu a difusión dalgúns dos aspectos máis
destacados do patrimonio cultural da Catedral de Santiago a través
dun apartado monográfico en Google Arts & Culture.
Neste
apartado ofrecíanse até agora catro mostras virtuais dedicadas ao
Camiño de Santiago, o Museo Catedral, o proxecto do Mestre Mateo e
os tapices de Goya, os cales foron fotografados coa tecnoloxía
Gigapixel, segundo destaca a fundación “un potente proceso de
captura que permite imaxes na máis alta resolución. Tamén se
achegaron percorridos virtuais por espazos do Museo, o Palacio de
Xelmírez e o Museo de Arte Sacra de Santa María A Real de Sar,
espazo xestionado pola Fundación Catedral a través do seu programa
Compostela Sacra.
Completando
esta presenza virtual do patrimonio catedralicio, a Fundación
Catedral presenta agora en Google Arts & Culture unha nova fase
no seu programa de colaboración, que é o resultado dun importante
traballo de investigación levado a cabo nos últimos meses, co
Pórtico da Gloria como elemento de referencia. Este proxecto virtual
ofrece como resultado catro exposicións temáticas a través das
cales é posíbel “coñecer en profundidade esta obra cume da arte
medieval, a súa mensaxe, o seu programa iconográfico, os aspectos
máis descoñecidos e, tamén, os datos sobre o complexo proxecto de
restauración que, co mecenado da Fundación Barrié, desenvolveuse
entre os anos 2006 e 2018, permitindo a recuperación deste
conxunto”, engadiu a Fundación Catedral de Santiago.
A
primeira destas exposicións leva por título O Pórtico da
Gloria, a obra cume do Mestre Mateo e permite
coñecer o relato apocalíptico e salvífico que se inicia na cripta
e desenvólvese a través das estatuas e os relevos dunha obra mestra
da arte universal; a segunda, Decodificando o Pórtico da Gloria,
céntrase no discurso iconográfico desenvolvido polo Mestre Mateo a
través das figuras encostadas na súa tripla arcada. Séguelle A
desaparecida fachada ao final do Camiño, onde o visitante poderá
coñecer algúns dos aspectos menos coñecidos do dito monumento
sacro. Por fin, o bloque complétase cunha exposición virtual
adicada ao proceso de restauración e, de maneira especial, ao
traballo de investigación realizado sobre as diferentes capas de
policromía do conxunto.
Neste
proxecto, dirixido polo director técnico do Museo Catedral,
participaron, como parte do seu período formativo, varios alumnos en
prácticas dos mestrados en Xestión Cultural e en Estudos Medievais,
así como do Grao en Historia da Arte da Universidade de Santiago.
Todas
estas exposicións virtuais atópanse dispoñíbeis, en castelán e
inglés.