A Casa Branca lexislará a obriga de informar tras ataques informáticos
luns, 12 de xaneiro do 2015
Nos últimos anos vimos como moitas compañías padeceron
ataques informáticos nos que se comprometeron datos persoais dos seus usuarios
e, en moitos casos, non se soubo destas intrusións nos seus sistemas até moito
despois, descoñecéndose o auténtico alcance da fenda na súa seguridade,
situación que crea grande preocupación, de aí que agora estean a dar conta de
que o presidente de EE.UU., Barack H. Obama, vaia pedir a creación
dunha lexislación federal para obrigar ás empresas americanas a ser máis
vixilantes cos datos persoais e de tarxetas bancarias dos seus clientes.
Entre as medidas que pretende Obana estaría a obriga de informar antes de 30
días das intrusións informáticas, dando conta tamén dos datos que se terían
comprometido en cada caso. Aínda que nun principio a lexislación federal só
buscaría crear unhas esixencias mínimas, deixando a cada estado a posibilidade
de establecer medidas adicionais.
O informe da Casa Branca que sustenta estas medidas asegura que “ante o
crecemento das ameazas informáticas e os roubos de identidade, as últimas
enquisas reflicten que nove de cada dez americanos senten que perderon dalgún
xeito o control dos seus datos persoais, o que podería levalos a un menor nivel
de interacción coa tecnoloxía, menor innovación e unha economía menos produtiva”.