A Cámara de Santiago móstranos como empregar a nube de xeito protexido e fiábel

O 22 de marzo a Cámara de Santiago celebra unha nova actividade formativa dirixida a facilitar o día a día das empresas e as persoas autónomas. Trátase do curso Os meus datos seguros na nube, que se desenvolve en horario de 10.00 a 11.30 horas ao abeiro do programa de accións da Oficina Acelera Peme (co-impulsada por Red.es e a entidade cameral).
Segundo lembra a organización do curso a respecto dos porqués do mesmo, só en 2020 a ciberdelincuencia aumentou un 125% en España e rexistrou máis de 40.000 ciberataques diarios. Amais, a cámara fai fincapé nos datos recentes do ITI (Instituto Tecnolóxico de Informática), que din que neste tipo de ataques son as pequenas e medianas empresas que teñen a súa infraestrutura localmente as máis afectadas.
A persoa encarga de impartir os contidos será Rafa Villaverde, director executivo (CEO) de cloud.gal e infonet.es. Graduado en Administración e Dirección de Empresas, Certified Data Privacy Professional por ISMS Forum e titulado como Experto en Dereito Informático e Pericias Xudiciales, exerce a súa carreira profesional como empresario e administrador no sector TIC desde o ano 2001
As Oficinas Acelera Peme (OAP) inclúense no Programa Operativo Plurirrexional de España FEDER 2014-2020 (POPE), co-financiado polo Fondo Europeo de Desenvolvemento Rexional (FEDER) e pola Entidade Pública Empresarial Red.es.