A Cámara de Santiago achéganos o día 16 unha xornada sobre facturación electrónica
mércores, 10 de xaneiro do 2024
A
Cámara de Santiago ofrece a vindeira semana unha nova cita formativa
de transformación tecnolóxica para as empresas da contorna
compostelá. Trátase da xornada Facturación
electrónica: Estado da situación da factura electrónica en
España e Europa | Lei Crea e Crece. Axuda Kit Dixital.
Desenvolverase o día 16 de
xaneiro, en horario de 10.00 a 11.00 horas e en formato en
liña. Comezará cunha presentación do programa Oficina Acelera
Peme, iniciativa estatal na que participa activamente a Cámara de
Santiago.
A
continuación, abordarase a cuestión da factura electrónica
(legalidade da facturación electrónica en España, breve camiño
pola historia da lexislación, SII, FaCe e FaCeB2B, Lei Crea e Crece,
estado da situación en Europa, polaridade entre estados membro,
solución Peppol e, por último, emisión e recepción electrónica
de factura: vantaxes para as compañías). A continuación afondarase
na solución de factura electrónica do Kit Dixital para rematar
cunha quenda de preguntas e o peche da sesión.
Trátase,
en palabras da Cámara de Santiago, dunha xornada tecnolóxica online
gratuíta para pemes, autónomos e emprendedores, que ten como
obxectivo “axudar ás compañías para entender as implicacións da
Lei Crea e Crece, concretamente, a obrigatoriedade da facturación
electrónica para todas as empresas e autónomos nas súas relacións
con outras empresas”.
Segundo
adianta a entidade cameral compostelá, “nun breve prazo de tempo,
todas as compañías deberán implementar a facturación electrónica
nos seus procesos diarios, tanto a súa emisión como a súa
recepción”. Grazas ás axudas do Kit Dixital, dispoñíbeis para a
dixitalización da facturación electrónica, “poderán adiantarse
ao cambio”.
A
persoa encargada de impartir estes contidos será Daniel Cerqueiro,
CMO na firma galega Docuten. Licenciado e doutor en Ciencias
Físicas, leva desde 2004 dedicado ás TIC (Tecnoloxías da
Información e a Comunicación). A súa principal ocupación actual é
ser o CMO de Docuten, ademais de ser un dos promotores de Startup
Galicia, e realizar actividades formativas relacionadas coa
transformación dixital e o emprendemento.
Esta
xornada está organizada pola Oficina Acelera Peme para o Kit
Dixital da Cámara de Comercio de Santiago de Compostela.
Kit
Dixital é un Programa do Gobierno de España, xestionado por Red.es,
entidade adscrita ao Ministerio de Transformación Dixital a través
da Secretaría de Estado de Dixitalización e Intelixencia
Artificial. O Programa Kit Dixital está dotado cun orzamento de
3.067 millóns de euros, financiado polo Plan de Recuperación,
Transformación e Resiliencia con fondos europeos Next Generation EU.
O seu obxectivo é dixitalizar a pequenas empresas, microempresas e
autónomos de todos os sectores en todo o territorio nacional.