A Cámara de Santiago aborda nunha xornada a vertente legal do proceso de transformación empresarial

A Cámara de Comercio de Santiago vai organizar unha actividade formativo-divulgativo que pon o foco na vertente regulamentaria que cómpre atender nos procesos de transformación do noso negocio cara ao novo escenario TIC. A xornada en liña Aspectos legais na dixitalización da túa empresa celebrarase o vindeiro 24 de febreiro, en horario de 10.00 a 11.00 horas. Incluirá a presentación da Oficina Acelera Peme, que é unha iniciativa conxunta de Red.es con todo tipo de entidades (incluída a entidade cameral) para favorecer a adaptación do tecido produtivo á Sociedade da Información.
A persoa encargada de impartir os contidos será Ramón Rey García, avogado de AUSUM, especialista en Dereito Civil. Ramón Rey desenvolveu a súa carreira profesional na Axencia Española de Protección de Datos e Castelao Avogados, boutique xurídica especializada en dereitos de autor e dirixida ás industrias culturais e tecnolóxicas.
Contidos
1. Propiedade intelectual dos bens intanxíbeis.
2. Rexistro de marcas e signos distintivos.
3. Lei de Consumidores e Usuarios. Honra, Intimidade e Propia Imaxe das persoas xurídicas
4. Lei de Servizos da Sociedade da Información e LOPD.
As Oficinas Acelera Peme (OAP) inclúense no Programa Operativo Plurirrexional de España FEDER 2014-2020 (POPE), co-financiado polo Fondo Europeo de Desenvolvemento Rexional (FEDER) e pola Entidade Pública Empresarial Red.es.