A Cámara de Comercio de Santiago convoca hoxe ás empresas culturais para achegalas ás redes sociais
luns, 26 de outubro do 2015
A Cámara
de Comercio de Santiago celebra hoxe unha xornada sobre a
importancia das redes sociais no plan de mercadotecina das industrias
culturais. O evento, que se desenvolve de balde entre as 10:30 e as
12:30 horas no viveiro de empresas de Costa Vella (rúa República
Checa, 40), insírese no Programa de creación e consolidación de
empresas de industrias culturais e creativas. O fundador da
consultoría de comunicación digital The Social Media Family, Pablo
Sanmarco, será o encargado de impartir a xornada.
Pablo centrará boa
parte dos contidos da sesión nas redes sociais e as industrias
culturais, o universo 2.0, a estratexia en social
media,
a identificación de comunicadores referenciais e a reputación en
liña e de crise. Segundo informa a Cámara, grazas á xornada “os
asistentes verán en que consiste un plan estratéxico de
comunicación e mercadotecina dixital ou os plans de personal
branding
para atraer clientes ou xerar confianza”. Ademais, engade a Cámara
compostelá, “os alumnos comprobarán a importancia de crear,
xestionar e actualizar perfís sociais e o valor das comunidades
virtuais para atender axeitadamente aos clientes e dinamizar a
audiencia da rede social”.