A Cámara de Comercio de Santiago permitirá que as empresas locais tiren partido do directorio Pymes.com
mércores, 25 de febreiro do 2015
A
Cámara de Comercio de
Santiago presentou na mañá deste mércores as vantaxes do
servizo Pymes.com, cualificado
pola entidade empresarial como “o primeiro directorio público da
empresa española”. Segundo engadiu a Cámara, o repositorio de
información corporativa xa está en marcha e a el adheríronse as
3.363 empresas que conforman o tecido produtivo de Santiago de
Compostela grazas ao acordo de integración que asinou a Cámara de
Comercio cos responsábeis do devandito portal. “Desta maneira”,
informou a entidade cameral, “por primeira vez o conxunto das PEME
da capital de Galicia conta de balde cun dominio propio e unha
presenza en liña dentro deste portal no que se inclúen os datos de
1,5 millóns de compañías españolas”.
O
directorio foi dado a coñecer na sede a entidade compostelá polo
seu presidente, Jesús Asorey, e máis polo delegado de Pymes.com,
Sergio Ruiz, quen fixo saber que se trata do primeiro portal de
España das súas características que achega “unha absoluta
fiabilidade dos seus datos, ademais de ser unha ferramenta
estratéxica na toma de decisións de compra”. Ademais, Ruiz animou
ás empresas de Santiago a tirar proveito das posibilidades do
directorio, e máis tendo en conta “a importancia de incorporar o
tecido produtivo compostelán á economía dixital fomentando a súa
presenza en Internet”.
O
conselleiro delegado de Pymes.com tamén destacou que “a partir de
agora calquera empresa da cidade e a súa contorna, con independencia
do seu tamaño e do sector no que opere, vai mellorar a súa
visibilidade en Internet, ademais de ampliar a cota de mercado con
novos clientes, tanto no ámbito local, como nacional e
internacional, xa que pode amosar os seus produtos e servizos dunha
forma personalizada”.
A
maiores, recordou que na gran maioría das compras que a día de hoxe
se efectúan en España, a decisión de mercar tómase a través de
Internet. Ademais, sinalou, o 58% das valoracións inflúen tamén na
adquisición do produto e servizo.
Respecto
das vantaxes concretas do directorio, Ruiz sinalou que o portal dá a
posibilidade de poder consultar unha información (Informe
Financeiro da Empresa) á que só adoitan ter acceso empresas
rexistradas como bancos, compañías de telecomunicacións ou grandes
corporacións. Son, explicou, datos relativos á identidade, contacto
da empresa e a información sobre acredores e tipo de débeda, entre
outras cuestións amosadas de xeito sinxelo e de doada comprensión.
Segundo engadiu, Sergio Ruiz, a información do informe permite que
“nunha ollada poidamos ver se a empresa consultada é un bo ou mal
pagador desde os últimos anos até o propio día no que se solicita
a emisión do informe”.
O
portal tamén expón datos do Índice de Notoriedade en Internet,
de acceso público e gratuíto. Este reflicte, cunha valoración de 0
a 500, a popularidade dunha empresa, o seu nivel de presenza dixital
así como a reputación percibida polos seus usuarios.