A Cámara da Coruña propón que a cidade herculina sexa a sede da Axencia Española de IA
venres, 14 de outubro do 2022
- Imaxe aérea da antiga Fábrica de Armas, hoxe en día Cidade das TIC
A
Cámara da Coruña emitiu
un comunicado no que solicita a candidatura da cidade herculina para
ser a sede da Axencia Española de Supervisión da Intelixencia
Artificial (AESIA), enumerando as principais potencialidades da
Coruña e súa contorna para dar unhas mellores operatividade,
rendemento e visualización ao futuro organismo estatal.
Segundo
lembra a entidade cameral, os Orzamentos Xerais do Estado para 2022,
establecen as bases da Axencia, podendo esta “estar
descentralizada”, de acordo con o previsto na normativa aprobada
polo RD 209/2022, do 22 de marzo. A este respecto, a Cámara realizou
unha análise da procedencia e oportunidade de que A Coruña poida
ser sede do devandito organismo de nova creación. Nesta análise
destácanse os seguintes puntos a favor:
-A
nivel empresarial, na cidade e a súa área de influencia existe en
pleno desenvolvemento, e en crecemento, un importante ecosistema
empresarial TIC, que aglutina a máis dun centenar de empresas e dá
emprego a catro mil tecnólogos, xerando o 60% do VAB do sector en
Galicia.
-A
nivel investigador conta coa presenza da Universidade da Coruña, que
ten a Facultade de Informática máis antiga de Galicia, cun grao
específico en Intelixencia Artificial, o CITIC (Centro Tecnolóxico
das Tecnoloxías da Información e Comunicación), único centro
galego coa distinción de Centro Singular de Investigación, e algúns
dos grupos de investigación máis punteiros de España en materia de
Intelixencia Artificial, presidindo unha catedrática desta
universidade a Asociación Española de Intelixencia artificial.
-A
nivel de infraestruturas está a poñerse en marcha a Cidade do TIC,
complexo de investigación e emprendemento que aglutinará unha parte
importante do conglomerado tecnolóxico da área e con capacidade
para albergar a sede da Axencia.
-A
nivel social existe un total consenso entre as forzas políticas,
empresariais, educativas e a sociedade civil para reclamar e apoiar
que A Coruña sexa a sede desta Axencia.
“Por
todas estas causas obxectivas, entendemos que A Coruña pode e debe
ser a sede permanente desta Axencia, solicitando das autoridades
pertinentes que así se considere”, conclúe o comunicado a
entidade cameral.