A CEP e o Consorcio Zona Franca impulsarán a innovación e a nosa presenza nos mercados externos
venres, 16 de marzo do 2012
O Consorcio
da Zona Franca e a Confederación
de Empresarios de Pontevedra celebraron os días pasados un novo achegamento
de forzas dirixido a facilitar e ampliar o camiño das nosas iniciativas de
mercado no exterior. Máis polo miúdo, e segundo fixeron saber o presidente da
CEP (José Manuel Fernández Alvariño) e a delegada do Estado (Teresa Pedrosa)
durante a reunión de traballo celebrada nas oficinas da Zona Franca, estamos
ante unha serie de accións estratéxicas para a internacionalización das
pequenas e medianas empresas e abrir liñas de colaboración no apoio á innovación
e ao uso das novas tecnoloxías de vangarda nas moitas facetas de actividade
dunha PEME.
Segundo engadiron as entidades, co fin de
impulsar o devandito obxectivo poranse en marcha, de xeito conxunto, unha serie
de misións empresariais e plataformas web que lle subministren a calquera
empresa ou persoa canles de promoción exterior e máis coñecemento sobre a
comercialización exterior galega “dun
xeito segmentado, claro e útil”. Contarase para isto, informaron, coa gran
vantaxe de dispor en Vigo do recinto da alfándega da Zona Franca, “cos beneficios que achega á importación-exportación
e contribuíndo de xeito decisivo a que Pontevedra sexa a quinta provincia
exportadora de España”.
A maiores disto, e coa finalidade de obter o máximo
proveito posíbel dos fondos europeos nos novos programas 2014-2020, a CEP pediu
a colaboración do Consorcio para traballar como socios institucionais dos
proxectos que se presenten ante Europa. Segundo fixo saber, “esta pode ser a derradeira oportunidade para
acometer proxectos estruturais que permitan dinamizar a Eurorrexión
Galicia-Norte de Portugal”. A Oficina de Proxectos da CEP, engadiu Fernández
Alvariño, detectou xa un total de 37 proxectos distribuídos nos sectores da
automoción, o metalúrxico, o granito, o téxtil, o conserveiro-pesqueiro, o
naval, a loxística, o transporte, a cultura, o turismo e máis o que nos colle
en Código Cero máis de preto: o das novas tecnoloxías da información. Nestes
proxectos, engadiu, será preciso esta colaboración institucional para acudir á
convocatoria europea con perspectivas de éxito. “A mellora na coordinación coa actividade privada supuxo que no último
programa europeo Innterconecta, por primeira vez Galicia fose quen de cubrir a
totalidade dos fondos asignados, xa que presentou 95 proxectos por un importe
de 245 millóns de euros, dos que Europa aprobou 26 deles, moitos vigueses, como
o caso de excelencia de Gradiant”, subliñou.