A CEC e Ineo amosan este xoves diferentes xeitos de transformar dixitalmente a nosa empresa

A sede da Confederación de Empresarios da Coruña (CEC) vai acoller este 2 de xuño (ás 18.00 horas) un evento para profesionais centrado nos recursos que podemos pór en xogo para converter a nosa empresa aos modelos rendíbeis, eficientes, eficaces e altamente comunicados dos nosos tempos. A xornada da CEC desenvólvese en colaboración coa asociación Ineo baixo o seguinte epígrafe: A Transformación Dixital da túa Organización-Oficina 2.0. Segundo apunta a organización, na xuntanza achegaranse múltiples claves para poder emprendermos a conversión tecnolóxica da nosa empresa, achegando luz sobre como automatizar os procesos empresariais, tirarlle proveito ás contornas colaborativas e mellorar a nosa xestión documental.
A xornada arrinca ás 18.00 horas coa presentación a cargo de Joaquín Montes (subdirector comercial de Din) sobre A transformación dixital nas empresas. Logo será a quenda de Jesús Fraga (director de Sector System), que achegará o relatorio Axilizando organizacións con usuarios 2.0. Ao fío das 18.30 horas Luis Calvo Blanco (director executivo de IntelJuice) abordará a cuestión da Transformación dixital con solucións dispoñíbeis de alto valor, e ás 19.15 horas será a quenda de Gerardo Portugués (consultor tecnolóxico de Din), que falará sobre A xestión documental e dixital. A xornada rematará arredor das 20.45, coa rolda de preguntas e o coloquio.