A CEC e ABANCA impulsarán a dixitalización das empresas na provincia da Coruña
mércores, 26 de xullo do 2017
A Confederación de
Empresarios da Coruña (CEC) e ABANCA asinaron hoxe un convenio de
colaboración para potenciar na provincia a creación de empresas
innovadora e de emprego botando man dos recursos máis avanzados que
nos brindan as novas tecnoloxías da información. A idea é botar
man das TIC en toda a cadea de valor: dende o xermolo da formación
até abranguer, tamén, o propio miolo da actividade das empresas. No
acto de rúbrica participaron o presidente da CEC, Antonio Fontenla,
e o director de Banca Institucional de ABANCA, Santiago Novoa.
Segundo fixeron saber, o
acordo abrangue un ano de duración e, en termos concretos, fai
oficial o compromiso conxunto das dúas entidades “a prol de
colaborar no pulo a aqueles proxectos que forman parte dos seus
compromisos sociais”, como son o apoio a emprendedores, as empresas
xa constituídas (dixitalizándoas) e as persoas desempregadas na
mellora da súa empregabilidade.
O convenio, sinalaron,
permitirá desenvolver un plan de actividades dirixidas a
emprendedores e empresarios da CEC, incluíndo un bloque de xornadas
técnicas adicadas a promover a empresa 4.0. “O obxecto destas
xornadas”, explicou Fontenla, “será potenciar o coñecemento e
desenvolvemento de competencias 4.0, comunicando ás empresas os seus
beneficios e as posibilidades que estas ofrecen”. Ademais,
fomentarase a colaboración das distintas áreas de empresas co uso
de contornas e plataformas colaborativas; impulsarase a
transformación dixital; porase ao alcance dos asistentes conceptos e
casos aplicados de empresas no desenvolvemento da industria 4.0 e
intercambiaranse experiencias e debater sobre a realidade das
empresas participantes e os sectores nos que operan.
Ademais, realizaranse
actividades formativas e informativas para fornecer aos emprendedores
e empresas “dos coñecementos precisos para afrontar o desafío que
supoñen o desenvolvemento de software e sistemas de análises que
converten o diluvio de datos, producidos pola dixitalización, en
información útil e valiosa, así como o cambio de ferramentas
analóxicas a dixitais”.
A idea, a través de
accións formativas específicas, é achegar aos emprendedores e ás
empresas a aprendizaxe desde a xestión documental ata o vídeo
dixital, pasando pola plataforma de formación en liña e a promoción
dixital das empresas.