A Biblioteca Universitaria da Universidade de Vigo organiza un curso sobre procuras de coñecemento
martes, 14 de xaneiro do 2014
- Exterior da Biblioteca Universitaria de Vigo
Saber
manexarse nunha biblioteca á hora de procurar un material
determinado non sempre é tarefa doada, e senón que llo digan a un
estudante que ten que levar a cabo un traballo ou unha investigación
académica. Tendo en conta isto, a Biblioteca
Universitaria da Universidade de
Vigo vén de anunciar a sétima
edición do curso virtual Máis
alá de Google. Como buscar e xestionar a información para un
traballo académico,
que comezará o vindeiro 20 de xaneiro.
Deste
xeito, ao longo de 30 horas (distribuídas en cinco semanas) o
alumnado dos últimos cursos, recibirá de xeito gratuíto, docencia
virtual, con correccións personalizadas, o que segundo sinala Antía
Salgado -xefa da Sección de Referencia da Biblioteca Universitaria-
“fai que o curso sexa moi atractivo” o que se traduce “en
moitísima demanda” até o punto de que as prazas ficaron esgotadas
nos primeiro minutos despois de abrirse o prazo de inscrición.
Dicir
que, por mor do éxito acadado neste curso (xa dende a súa primeira
edición), estanse a realizar tres convocatorias ao ano coa
finalidade de chegar ao maior número de persoas que desexen aumentar
as dúas destrezas na procura de información, afondar nos recursos
existentes na Biblioteca e na Internet e formarse no uso e
comunicación da información. Engadir que a realización do curso
implica o recoñecemento de
dous créditos de libre elección e un crédito ECTS.
Amais
do demandado Máis
alá de Google. Como buscar e xestionar a información para un
traballo académico,
a Biblioteca Universitaria completa a súa formación de usuarios con
dous cursos máis, tamén gratuítos, de acceso permanente. O
primeiro encamiñado a axudar ao estudantado de primeiro curso dos
graos a mellorar as súas competencias en xestión da información e
no seu uso legal baixo o nome Coñece
a Biblioteca e aprende a buscar, avaliar e utilizar a información.
A oferta complétase con Busca
e xestión da información para o TFG,
unha formación deseñada para axudar ao alumnado a optimizar o uso
dos recursos de cara á realización do seu traballo de fin de grao,
proxecto fin de carreira ou investigacións semellantes.