A Biblioteca Municipal de San Sadurniño dá o chimpo ao dixital
xoves, 3 de setembro do 2020
A
Biblioteca
Municipal de San Sadurniño está estes días dando o chimpo ao
universo dixital, integrándose na xestión compartida da Rede de
Bibliotecas Galegas. O proceso, segundo informa o Concello,
inclúe tarefas como o etiquetado con código de barras de todos os
fondos, uns distintivos que axilizarán o proceso de préstamos e
devolucións. A demais, a partir do día 10 de setembro a Biblioteca
de San Sadurniño integrarase na plataforma Kohabib impulsada pola
Rede de Bibliotecas de Galicia como “ferramenta única de xestión
de todas as axencias de lectura”.
O
Concello engade que esta adhesión á plataforma ofrecerá “servizos
engadidos a todas as persoas usuarias, como por exemplo levar conta
nun perfil persoal de todos os títulos lidos, a posibilidade de
comentalos e recomendarllos a outras lectoras e lectores, recibir
alertas sobre vencementos de prazos de devolución, ou a posibilidade
de usar o mesmo carné en case todas as bibliotecas galegas”.
As
veciñas e veciños que queiran tirar proveito deste servizo e ter
acceso ao catálogo compartido terán que darse de alta na
plataforma, un proceso que poden facer tanto as persoas que xa sexan
usuarias da biblioteca como aquelas que vaian solicitar o carné por
primeira vez. En termos máis concretos, entrar en Kohabib suporá
para a cidadanía do concello obter unha nova tarxeta válida para
solicitar préstamos ou consultas na nosa biblioteca de cabeceira,
pero tamén en calquera outra integrada na rede galega onde xa estea
implantado o sistema (nas municipais e tamén nas dependentes da
Xunta, da Deputación e de varios museos e entidades públicas e
privadas).
O
Concello en engade que a alta no sistema de xestión de catálogo
tamén permite dispor dun cartafol “da bagaxe literaria local”,
amais de “comentar títulos e facer recomendacións”. Asemade,
poderanse poderán reservar anticipadamente títulos que se encontren
prestados.