A Aula CESGA deixa atrás a liña dos 20.000 usuarios
venres, 2 de decembro do 2011
- Nenos participantes nas escolas rurais 2.0 do CESGA
O Centro
de Supercomputación de Galicia vén de facer reconto do acadado a través da
súa plataforma gratuíta de aprendizaxe a distancia, apoiada en innovadoras e
potentes tecnoloxías de comunicación, a Aula
CESGA. Pois ben, a escola-ferramenta de e-learning
xa conseguiu, segundo datos que achega o propio centro emprazado no Campus
Sur de Santiago, superar a liña dos 20.000 usuarios. A aula, dirixida a
favorecer a investigación e máis a divulgación arredor das novas tecnoloxías no
ensino, foi posta en marcha en 2002 da man do Departamento e-Learning do CESGA,
que procurou en todo intre que fose útil e accesíbel para os docentes e para os
investigadores galegos.
Tanto foi así, que a plataforma,
ao longo deste tempo, aumentou as súas solicitudes de creación de cursos e
espazos de colaboración até chegar aos máis de 700 que arestora están en activo.
En total, informa o CESGA, 20.681 usuarios empregan
hoxe esta plataforma nun total de 718 cursos de diferentes ámbitos e niveis de
ensino. Os motivos deste éxito son moitos e variados, pero para o centro galego
cómpre salientar o feito de que se trate dunha ferramenta aberta, versátil e de
uso sinxelo. Con estes e outros ingredientes,
permíteselle ao docente dispor dun punto “de
encontro onde compartir recursos tecnolóxicos e educativos cun grupo de
estudantes ou profesores, como unha aula complementaria ás súas clases,
accesible as 24 horas do día e cunha administración moi sinxela que fai máis
doado o apoio aos alumnos fóra das horas lectivas a través dos foros”.
Os usuarios contan con ferramentas comunicativas, zona de
documentación, de traballo en grupo, modificación dos datos do seu perfil, etc.
que lles facilitan o seu uso. O docente pode crear e administrar os seus
espazos de aprendizaxe desde un navegador, pero tamén intercambiar información
e traballar colaborativamente e en grupo con outros docentes para mellorar o
seu ensino. Segundo se conta dende o centro galego, “desde 2002 a Aula converteuse en plataforma de referencia para docentes
de toda Galicia no que se refire á aplicación de novas tecnoloxías no eido do
ensino”. O abano de traballos desenvolvidos ao seu abeiro é ben amplo, con cursos
de educación primaria, secundaria, de ciclos ou de universidade. Para facernos
unha idea, dicir que arredor de 100 destes cursos están a ser utilizados como contorna de
colaboración por profesores e investigadores. “Un caso rechamante”, salienta o CESGA, “é o das Escolas Oficiais de Idiomas de Galicia, que conta con 300 cursos
rexistrados na Aula”.