A Agrupación Ío conmemora no bar Ateneo da Coruña o Día da Muller e a Nena na Ciencia
xoves, 10 de febreiro do 2022
A
Agrupación Astronómica Coruñesa Ío conmemora a celebración deste
11 de febreiro, Día Internacional da Muller e a Nena na Ciencia,
cunha
nova iniciativa para divulgar astronomía: Groliños de estrelas.
A cita será este venres ás
20:00h no bar cultural Ateneo, onde se celebrará a primeira
charla do proxecto Groliños, baixo o título Mulleres
Pioneiras.
Máis
en detalle, o proxecto Groliños de estrelas: astronomía
contada en pequenas doses e boa compaña é unha iniciativa da
Agrupación Astronómica Coruñesa Ío para “levar a divulgación
da astronomía aos bares e cafeterías, nun formato de pequenas
charlas arredor dun mesmo tema”.
Esta
primeira edición celebrarase o venres 11 de febreiro de 2022 ás
20:00h no Ateneo Bar Cultural da Coruña (Reverendo Padre José
Álvarez Cabeza, 1 baixo, 15011, A Coruña). Serán, como dixemos, 5
pequenas charlas (5-10 minutos) sobre Mulleres Pioneiras na
astronomía.
Desta
volta, a charla a desenvolve un dos grupos de traballo da entidade, o
GT Muller e Astronomía, que ten como obxectivo mostrar o papel da
muller neste eido da ciencia e da divulgación. Na charla
participarán Nuria Richer, Paula Neira, Lorena Casete, Iago Varela e
Carmen Denébola, cun repaso a referentes femininos da investigación,
tanto profesionais como personaxes da ficción infantil e xuvenil que
amosan paixón pola ciencia e o coñecemento.
Esta
actividade ten lugar polo Día Internacional da Muller e a Nena na
Ciencia, unha celebración impulsada pola Asemblea Xeral das Nacións
Unidas dende 2015 para conmemorar e recoñecer a traxectoria de todas
aquelas mulleres que teñen contribuído ao avance da ciencia e a
tecnoloxía e cuxa historia moitas veces ten quedado no esquecemento.