A AETG e Gradiant premiarán a mellor tese doutoral do eido TIC
martes, 26 de xullo do 2011
A
Asociación de Enxeñeiros de Telecomunicación de Galicia (AETG) quere recoñecer os traballos feitos dende
as nosas universidades en materia de investigación en redes e Sociedade do
Coñecemento, traballos que contribúen a abrir novos e importantes vieiros de
actividade para os nosos profesionais e o noso sector e que, tamén, axudan a
establecer máis e mellor comunicación entre universidades, centros de I+D e
sector privado. Estamos a falar do Premio Gradiant á Mellor Tese Doutoral Aplicada
no sector das Tecnoloxías da Información e da Comunicación. O recoñecemento,
patrocinado polo Centro Gradiant e
convocado pola AETG, entregarase no marco da XVI Noite Galega das
Telecomunicacións, que se desenvolverá o vindeiro 21 de outubro no Gran Hotel
da Toxa.
O
obxectivo das entidades responsábeis do premio é “recoñecer a excelencia daqueles investigadores das universidades
galegas que teñan completada a súa tese doutoral nun eido aplicábel ao sector
TIC”.
Ao
premio, que lle achegará 2.000 euros ao responsábel da investigación gañadora,
poderán optar aquelas persoas que teñan defendido a súa tese nalgunha das tres
universidades galegas durante os anos 2008, 2009, 2010 e 2011 e que poida inserirse
nalgún dos seguintes eidos: transferencia tecnolóxica (patentes, licencias) e
orientación ao negocio.