8patas.es permite ós cans buscar parella na Internet

Cando Juan Pardo cantaba aquilo de “o meu can xa ten cadela” de seguro que non pensaba en que os cans poderían facer o mesmo uso que as persoas para socializar na Rede e buscar parella, de xeito que agora se os humanos poden ir a Meetic ou a Match.com, os cans poden facer o mesmo en 8patas.es, unha nova web que permite ós propietarios de mascotas caninas a posibilidade de atoparlles unha parella para o cruce, aínda que a cousa non queda aí, senón que a mesma web permite buscar no seu catálogo no que aparecen tanto cadelos para o seu cruce, coma en oferta de compra/venda ou adopción, podendo tamén catalogar os animais en atopados ou perdidos, o que resulta moi útil para os amantes dos animais, que mesmo poden consultar esta información por provincias.
O servizo aínda conta con poucos rexistros, pero pretende converterse nunha útil ferramenta para as persoas que gusten do mellor amigo do home de xeito que poidan visitar a nova web para a compra, venda, adopción e recuperación de cans, así como para compartir experiencias nos seus foros de próxima creación, ler artigos sobre temas de interese ou consultar os anuncios clasificados publicados.