220 locais galegos, recoñecidos cos premios de excelencia da comunidade Tripadvisor
luns, 27 de maio do 2013
TripAdvisor,
a web de viaxes do mundo, anunciou este luns os gañadores dos seus
Certificados de Excelencia 2013, entre os cales se atopan 220
galegos: 102 aloxamentos, 109 restaurantes e 9 lugares de interese.
Actualmente no seu terceiro ano, este galardón recoñece a
excelencia en hostalaría e, segundo informa a dita web, só se
concede aos locais que acadaron excelentes opinións dos
viaxeiros-internautas membros da comunidade TripAdvisor. “Os
gañadores do Certificado de Excelencia atópanse en todo o mundo e
representan un alto nivel dos establecementos que aparecen na web; só
o 10% recibe este prestixioso galardón”, engaden os
responsábeis da páxina. En total, 7.886 establecementos en España
recibiron o galardón, representando un importante incremento con
respecto ao ano pasado, no que se entregaron 4.420 certificados.
Os gañadores do dito
recoñecemento este ano van desde pensións e hostais até hoteis de
6.000 habitacións, panadarías, restaurantes con estrelas Michelin,
atraccións pouco coñecidas ou parques temáticos de prestixio e
museos. Segundo informa Tripadvisor, as propiedades galardoadas poden
dar a coñecer o seu éxito de múltiples formas, incluíndo o
certificado físico que recibirán nas vindeiras semanas, amosalo na
súa páxina web, ou comunicalo aos medios a través dunha nota de
prensa. Os gañadores do ano pasado promoveron o seu galardón “con
éxito” a través das redes sociais, destacando o triunfo do
seu negocio en Twitter e o Facebook, así como informando aos seus
anteriores e actuais clientes do seu galardón, fomentando a
repetición de visitas.