133 millóns máis para o pulo da banda larga
luns, 10 de xaneiro do 2011
- Actividades de dixitalización dos Cibervoluntarios, apoiadas polo Plan Avanza
O Ministerio de Industria vén
de conceder unha nova partida de apoios para o espallamento dun acceso á Internet de
calidade. Máis polo miúdo, trátase dunha achega de axudas por valor de 133 millóns
de euros “para a implantación de
infraestruturas de rede de banda larga”. As axudas, incluídas no Plan Avanza2, exercicio
2010, consisten en empréstitos brandos dispoñibles para as empresas que centran
a súa actividade no fornecemento de servizos de acceso á Sociedade do
Coñecemento: os operadores de telecomunicacións. En total, impulsaranse 73
proxectos desta índole.
Os obxectivos desta nova
partida de financiamentos parten da base mesma do proceso de espallamento da
banda larga. Deste xeito, entre outras cousas posibilitarase o despregue dos
equipamentos precisos para o fornecemento de servizos de banda larga con
velocidades de baixada de polo menos 1 Mbps, para a poboación que arestora
carece da devandita cobertura. Este subministro de acceso básico abranguerá 19
proxectos por un importe total de 57,56 millóns Asemade, incluirase unha
segunda liña de actividade para o pulo á banda larga de alta velocidade. Este
proceso paralelo dará acubillo a 54 proxectos e a un financiamento íntegro de
75,78 millóns de euros.
