1.200 cidadáns empregaron xa a ferramenta de seguimento do Plan de Banda Larga
luns, 21 de febreiro do 2011
O espallamento da banda larga que está a
impulsar a Secretaría Xeral de Modernización en certas áreas xeográficas da
nosa terra (aquelas que a xuízo da Xunta máis fican a contrapelo duns accesos ás
redes cun mínimo de calidade) inclúe dende o pasado 10 de xaneiro un complemento
web para consultarmos até onde está a chegar, precisamente, este espallamento. Segundo
informa estes
días Modernización, a ferramenta en liña consolidouse coma un recurso
imprescindíbel do proceso. Tanto é así, engade, que dende a súa posta en marcha até o pasado 15 de febreiro, foi
consultada xa por un total de 1.200 usuarios, interesados en informarse da
situación do Plan de Banda Larga no seu núcleo de poboación a través do
Rexistro de Demandantes ReDe.
Este recurso, accesible dende a web de Modernización, vai alén da
simple achega de información fornecendo aos cidadáns demandantes de conexión
dun formulario de inscrición que dá acubillo á súa solicitude perante futuros
traballos de despregue. Neste senso, ao longo do primeiro mes de vida do servizo até 200 persoas sen
cobertura levaron a cabo o dito proceso. “Esta información”, engade a Xunta, “permite realizar un seguimento do plan e
contribuír á planificación das actuacións previstas no Plan”.