Xornal.com renova a súa imaxe

A nova web do Xornal de Galicia aposta por unha participación cidadá que non chega

A primeiros de decembro chegaba aos quioscos galegos a cabeceira de prensa Xornal de Galicia, que na Internet aproveitou a publicación dixital Xornal.com como cara visible, aínda que as presas deste lanzamento non permitiron que adaptaran a plataforma en liña como era debido, e limitáranse practicamente a modificar a cabeceira da web para reflectir que Xornal.com pasara a ser a versión en liña do Xornal de Galicia. Case 3 meses despois, e en vésperas dunha cita electoral, deciden finalmente lanzar unha renovación a web, cunha estética máis moderna, e cun deseño acorde co novo medio de comunicación de ámbito autonómico.
Dende Xornal.com aseguran que o seu novo molde achega a interactividade e a proximidade ao lector, o que se traduce no reforzamento do seu Plan Conect@, unha sección na que os usuarios poden pendurar da web as súas propias fotografías e vídeos para compartilos co mundo, á vez que amplían a súa zona de opinión cunha tribuna aberta e cartas ao director, tendo estes contidos tamén reflexo na edición impresa. Queda todo agrupado baixo o logotipo de Conect@, e pese a que xa leva varios días operativa esta posibilidade, non parece que goce de actividade, pois todos os contidos presentes son anteriores á estrea desta sección e están asinados polo mesmo usuario (polo que entendemos que son de proba). Queda así en dúbida a elección dos nomes de seccións coma Foto del día ou Vídeo del día, que carecen de información actual, e dá a impresión de que dende Xornal fixeron unha aposta excesiva pola participación, que dificilmente verase correspondida se atendemos a experiencias anteriores de medios de maior entidade (como a CNN ou El País).

En 3 días de actividade a sección de Conect@ non conseguiu atraer contidos xerados polos lectores