Viewtiful Joe e Dormammu sairán no Marvel vs Capcom 3

mércores, 18 de agosto do 2010 Marcus Fernández

Que Marvel vs Capcom 3 é un dos xogos de loita máis agardados dos últimos tempos é algo que non se lle escapa a ningún afeccionado do xénero, de aí que dende Capcom prefiran dar información sobre o mesmo con contagotas, e tras desvelar na pasada Comic-Con de San Diego varios dos personaxes que aparecerán neste título que sairá á venda na primavera de 2011, aproveitan agora o Gamescom de Colonia para anunciar a 2 novas incorporacións que serán bastante ben recibidas, pois falamos do malvado demo Dormammu dos comics da Marvel (inimigo xurado do Dr. Estraño, personaxe que aínda non confirmou a súa presenza no xogo) e do carismático Viewtiful Joe, pequeno heroe nacido en 2003 no xogo que leva o seu nome para GameCube e que tamén levou as súas aventuras á PlayStation 2.
Un dos detalles máis interesantes deste anuncio é o feito de que, aínda que xa se rumorease a aparición de Viewtiful Joe en Marvel vs Capcom 3, a presenza de Dormammu é toda unha sorpresa, de xeito que a listaxe completa de loitadores que dabamos por certa podería non ser totalmente atinada, e nos vindeiros días poderiamos ter algunha outras sorpresa.

Viewtiful Joe é un personaxe moi querido que tivera grandes xogos para GameCube e PS2
Sorprende ver que un poderoso demo coma Dormammu enfrontarase a golpes cos loitadores de Marvel vs Capcom 3
Os ataques de Dormammu prometen ser devastadores

PUBLICIDADE