Microsoft presenta 2 novos móbiles pensados para rapaces conectados

Esta tarde Microsoft celebrou un evento para dar a coñecer 2 teléfonos móbiles, confirmándose os rumores e concretando o nome dos terminais ata o momento coñecidos coma Turtle e Pure, que finalmente teñen por nome KIN ONE e KIN TWO, que inicialmente serán comercializados por Verizon nos EE.UU. a partires do mes de maio e chegando a Europa da man de Vodafone no outono.
Microsoft KIN é unha aposta polos teléfonos móbiles orientados a un uso social que tanto esixe a mocidade actual, e que nace do traballo de Danger, compañía que desenvolveu o popular terminal T-Mobile Sidekick (tamén coñecido coma Danger Hiptop) e que foi adquirida pola compañía de Redmond, de xeito que deberiamos ver este anuncio coma unha medida de continuidade e non coma un cambio estratéxico, posto que Microsoft continuará apostando pola plataforma Windows Phone 7 (que converterase nunha realidade tanxible a finais de ano). A fabricación estes móbiles faise en colaboración con Sharp.
O KIN ONE e o KIN TWO son terminais telefónicos conectados á Internet para potenciar o seu uso social, que en ambos casos presentan pantalla táctil, teclado deslizante, Wi-Fi, Bluetooth e 3G, pero con distintos tamaños e prestacións. O KIN ONE un tamaño moi compacto, o seu teclado estaría pensado para a escritura cunha man, a súa pantalla (de 2,6 polgadas cunha resolución de 320 x 240 píxeles) manexaríase de xeito doado co dedo polgar, contará cunha capacidade interna de 4 Gb, altofalante mono e cámara de 5 Mpíxeles con flash; mentres que o KIN TWO, co seu maior tamaño, facilitaría a escritura con dúas mans, gozaría dunha pantalla de bo tamaño (de 3,4 polgadas cunha resolución de 480 x 320 píxeles), 8 Gb de capacidade, altofalante estéreo e cámara de 8 Mpíxeles con flash capaz de gravar vídeo a 720p.
O sistema operativo destes terminais está baseado no Zune, de xeito que, aparte de permitir comunicarse con Facebook, MySpace e Twitter, tamén goza dunha reprodución multimedia completa, con soporte para audio, vídeo, reprodución de podcast e recepción de radio FM. Tamén soporta o acceso a música á carta mediante subscrición (Zune Pass).

O Kin Two pode utilizarse coas dúas mans

A relación destes novos terminais coas plataformas de redes sociais sostense principalmente en 3 piares: KIN Spot, unha área á que arrastrar os contidos do teléfono que queiramos compartir en redes sociais; KIN Loop, a páxina principal dos terminais, na que figuran os contidos das nosas redes sociais ordenados segundo prioridades moi atinadas (colocando antes aos nosos amigos reais que aos amigos virtuais);e KIN Studio, unha liña de tempo visual que recolle os nosos elementos compartidos, no que poderiamos describir coma unha biografía do usuario.
Os contidos no móbil estarán cargándose constantemente á Rede, de xeito que a capacidade de almacenamento interna dos terminais pasará a un segundo plano, pois as fotografías e vídeos terán sempre un respaldo na Internet, de xeito que estarán sempre dispoñibles tanto dende un ordenador coma dende o propio terminal telefónico.
Cómpre destacar que este nosos terminais non deberían considerarse smartphones, pois non corren aplicacións instalables polo usuario (aínda que gocen dun potente procesador nVIDIA Tegra, que dótaos de grande fluidez), pero iso non será un atranco para o seu éxito entre os mozos, por combinar as bondades do T-Mobile Sidekick e do Zune HD.