Youtubeir@s chega ao seu derradeiro chanzo acollendo máis dun centenar de vídeos
martes, 25 de abril do 2017
Xa vai quedando menos para presentarmos a nosa
achega audiovisual á primeira edición de Youtubeir@s,
o concurso de vídeos na Rede destinado a impulsar e dinamizar a
presenza en liña da nosa lingua (e máis a creatividade dixital da
mocidade na nosa lingua). Segundo vén de lembrarnos unha das
entidades impulsoras do concurso, a Universidade da Coruña, este
venres 28 de abril é o derradeiro día para presentarmos o noso
traballo. A
UDC tamén lembra que o concurso acubilla dúas categorías,
Vídeo-opinarmos e Vídeo-facermos.
Poden participar todas as persoas maiores de 14 anos con vídeos de
até cinco minutos de duración, sendo a cifra total de premios de
4.000 euros. O peche e entrega de galardóns será o venres 26 de
maio ás 20:00 horas no Teatro Principal de Ourense. A día de hoxe,
xa foron recibidas máis de cen contribucións.
Como dixemos, neste intre xa podemos ver
na canle de Youtube do concurso un amplo e variado abano de
vídeos: dende receitas de cociña até consellos sobre como quitar
os puntos negros do nariz ou como facer pasta de dentes para
elefantes, dende faladoiros sobre a praga da couza guatamalteca até
interesantes reflexións sobre o amor na Rede. O xurado, composto por
Manolo González, María Lado, Manuel Núñez Singala, María Yáñez
e Pablo Lamosa xa está arestora visualizando e valorando os
audiovisuais participantes.
Youtubeir@s, como lembraremos, é unha iniciativa
dos servizos de normalización lingüística (SNL) dos concellos da
Baña, A Coruña, Ames, Carballo, Mazaricos, Ourense, Pontevedra,
Ribadeo, Santiago de Compostela, Teo e O Grove; e tamén das
universidades da Coruña, Santiago de Compostela e Vigo. O proxecto
ten tres piares fundamentais: a procura de youtubeiras e youtubeiros,
a formación para quen queira selo, e un concurso para incentivar que
se fagan vídeos de titoriais e opinións en galego na Rede, con
4.000 euros en premios, e co prazo de inscrición aberto até o 28 de
abril.
Os vídeos que se presentan ao certame deben ter unha
duración máxima de 5 minutos, estar licenciados en creative
commons (licencia aberta, feita para produtos que se queren
compartir e co requisito de acreditar de autoría), seren producidos
en galego e estaren habilitados na rede social YouTube. Os e as
participantes poderán concorrer a dúas categorías:
Vídeo-facermos (para videotitoriais que amosen como facer
cousas) e Vídeo-opinarmos (para vídeos nos que se
achegue unha opinión ou valoración sobre calquera tema.
Cada
unha destas categorías vai ser premiada cunha contía de mil euros
e tamén se asignarán catro mencións honoríficas de
cincocentos euros segundo os criterios de valoración que terá en
conta o xurado, composto por profesionais da comunicación
audiovisual.
Youtubeir@s, en palabras das ditas entidades, “ten
a vontade de incrementar o uso do galego nos contidos audiovisuais
dunha das redes sociais máis empregadas no mundo, a segunda con
meirande nivel de uso despois de Facebook, e tamén quere incitar e
facilitar que todas as persoas compartan as súas habilidades e
criterios con vídeos autoproducidos”.