Xuventude de Lugo lanza un concurso de curtametraxes para a mocidade confinada
venres, 24 de abril do 2020
A
Concellería
de Xuventude de Lugo lanzou esta semana un concurso de curtametraxes
para mobilizar o talento e as capacidades da mocidade durante o
confinamento, achegándolles lecer, creatividade e, tamén, premios.
“O que se pretende con esta iniciativa é animar á poboación
xuvenil e dar opcións para que aproveiten as horas na casa
realizando actividades que lles gusten ao tempo que desenvolven dotes
artísticas”, explicou a edil Ana González Abelleira, engadindo
que o certame inclúe tres galardóns, un por categoría. As
contribucións poderán presentarse até o 10 de maio. Un xurado
profesional emitirá o fallo antes do verán.
A
edil, responsábel da área de Muller, Igualdade e Xuventude explicou
que o certame está aberto a mozas e mozos de 14 a 35 anos
empadroados en Lugo, que estuden ou traballen no municipio; existindo
tres categorías, unha para rapaces e rapazas de 14 a 18, outra de 18
a 25 anos, e unha última de 26 a 35 anos. “As e os participantes
compartirán a súa experiencia, inquietudes e reflexións ao redor
da situación actual”, subliñou a concelleira que tamén indicou
que serán excluídos aqueles traballos que teñan connotacións
sexistas, xenófobas, racistas ou de índole ofensiva.
As
curtas, que deberán ser orixinais e inéditas, deberán rodarse no
domicilio con calquera dispositivo tecnolóxico non podendo superar o
minuto de duración. Cada curta deberá ter un título (no caso de
non empregar a lingua galega, deberá contar con subtítulos) e
presentarase nos seguintes arquivos: MOV, MPEG4, AVI, WMV, MPEGPS,
FLV, 3GPP, WebM.
Os
traballos deberán achegarse antes das 21:00 horas do domingo, 10 de
maio, e deberán remitirse por enderezo electrónico, en arquivo
adxunto, a xuventude@lugo.gal. O tribunal, que estará formado por 3
membros do eido cultural e audiovisual do municipio, valorará
preferentemente, ademais da calidade artística das obras, a
orixinalidade e/ou imaxinación, así como o feito de abordar temas
que enxalcen a solidariedade humana e a súa capacidade de
supervivencia ante dificultades”, sinalou Ana González ao tempo
que concluíu que o fallo darase a coñecer antes do verán e a
entrega de premios anunciarase oportunamente. As bases poden verse na
páxina web do Concello.