Xoia e Impresión 3D Atlántico mostran o potencial da realidade virtual e a impresión 3D
martes, 12 de marzo do 2019
A
sede do Colexio Oficial de Enxeñeiros
Industriais de Galicia (ICOIIG) na Coruña acolleu este martes
dúas sesións formativas encadradas no programa da súa Oficina de
Transformación Dixital (OTD), que o colexio presentou os días
pasados en Lugo
e máis en Santiago.
A primeira das sesións de hoxe centrouse na tecnoloxía de realidade
virtual, mentres que a segunda tratou as utilidades da impresión 3D.
Xoel
Vázquez Dios, director executivo (CEO) de Xoia
Software, falou sobre como aplicar a realidade aumentada e
virtual a sectores como a Industria 4.0, a venda ao detalle (retail)
ou o turismo. Ao fío disto e para ilustrar as posibilidades das
ditas tecnoloxías mostrou un proxecto desenvolvido pola súa
empresa, que utilizou este tipo de recursos innovadores para
“musealizar xacementos arqueolóxicos”. Vázquez Dios salientou
que a realidade aumentada e virtual “axuda non só a mellorar
procedementos internos, senón tamén a optimizar a canle de venda ou
mesmo a aforrar custos na formación de técnicos e operarios”. En
definitiva, dixo, trátase “de ferramentas cunha manchea de
utilidades que se poden pór ao servizo das PEME”.
A
segunda sesión formativa da mañá correu a cargo de Guillermo
Blanco, enxeñeiro industrial xerente da empresa galega Impresión
3D Atlántico. Durante a súa intervención, o relator sinalou
que “a impresión 3D é unha ferramenta máis ao servizo da empresa
e calquera profesional ou empresas son susceptíbeis de seren
usuarios”. Na súa opinión, esta tecnoloxía é unha vantaxe
competitiva importante para a empresa e converterase “nunha
ferramenta común co paso do tempo, xa que permite pensar de forma
máis complexa e buscar solucións”.
124
accións nos vindeiros meses
As
actividades de hoxe enmárcanse nun intenso calendario de 124 accións
coas que o ICOIIG chegará ao sete principais cidades galegas até o
próximo mes de setembro. Todas elas son de acceso libre e de balde
para todas as empresas interesadas.
Esta
campaña divulgativa afondará en aspectos como a forma de sacarlle
proveito á realidade aumentada, as oportunidades da impresión 3D,
as solucións que permite a análise da información a gran escala
(Big Data) o desenvolvemento da mercadotecnia dixital, a
Intelixencia Artificial, a robótica, a dixitalización dos almacéns
coa loxística 4.0, a aplicación da tecnoloxía blockchain
aos negocios, as contribucións do uso de drons nas empresas ou a
utilidade da ciberseguridade ante os riscos dixitais.
As
Oficinas de
Transformación Dixital postas en marcha en toda España polo
Ministerio de Economía e Empresa, a través da entidade pública
Red.es, contan cun orzamento global de cinco millóns de euros. As
actuacións a realizar serán financiadas con cargo ao Programa
Operativo Plurirrexional de España (POPE), Fondos Europeos de
Desenvolvemento Rexional (FEDER) do período de programación
2014-2020 e baixo a lema Unha maneira de facer Europa que ten
entre os seus obxectivos mellorar o uso, a calidade e o acceso ás
Tecnoloxías da Información e a Comunicación (TIC).