Xbox permitirá a compra de xogos dende o móbil

Xbox está a anunciar unha serie de actualizacións nas súas plataformas co obxectivo de mellorar a experiencia de xogo e ofrecer máis comodidade aos usuarios, destacando a posibilidade de comprar xogos directamente desde a aplicación móbil, a opción de retransmitir xogos en propiedade dende consolas Xbox, novas ferramentas para liberar espazo de almacenamento e a ampliación da compatibilidade do xogo remoto a máis dispositivos.

Compra de xogos desde a aplicación móbil

Unha das novidades máis destacadas é a incorporación da compra directa de xogos e contidos adicionais desde a aplicación móbil de Xbox. Esta funcionalidade, moi demandada pola comunidade, permitirá tamén unirse a Game Pass e trocar Perks desde o móbil. A nova opción, que comezará a chegar a usuarios beta en iOS e Android, permitirá facer reservas de lanzamentos e configurar a súa preinstalación nas consolas.
A interface da aplicación incluirá un botón de compra nas páxinas de detalle dos xogos para os usuarios que xa teñan un método de pago gardado, facilitando así unha experiencia máis rápida e integrada.

Xogos en streaming desde a túa propia consola

Outra mellora significativa chega para os membros de Game Pass Ultimate, que desde agora poderán retransmitir non só os xogos do catálogo, senón tamén os seus propios xogos en propiedade, directamente desde as consolas Xbox Series X|S e Xbox One. Esta opción, xa dispoñible en dispositivos como televisores conectados de Samsung ou dispositivos Amazon Fire TV, permitirá aforrar espazo no disco duro e acceder aos xogos sen necesidade de descargalos.
A biblioteca de títulos compatibles segue a medrar, con máis de cen xogos dispoñibles para o xogo na nube. Títulos recentes como Subnautica 2 ou Disney Epic Mickey: Rebrushed, e lanzamentos inminentes como Empire of the Ants ou Wizard of Legend II, forman parte do catálogo.

Expansión do xogo remoto

Xbox tamén anunciou a ampliación do servizo de xogo remoto, que permitirá acceder a xogos instalados na consola desde calquera dispositivo cun navegador compatible a través de xbox.com/remoteplay. Esta opción estará dispoñible en máis plataformas, incluíndo televisores conectados, dispositivos Amazon Fire e visores de realidade virtual Meta Quest. Como novidade destacable, os xogos retrocompatibles das consolas Xbox orixinal e Xbox 360 tamén poderán xogarse remotamente.

Ferramentas para xestionar espazo e novas funcionalidades sociais

Co novo sistema para liberar espazo en consolas Xbox, os xogadores recibirán suxestións intelixentes para eliminar contidos duplicados, complementos non utilizados ou xogos aos que xa non teñen acceso. A nova funcionalidade pode activarse desde o menú Xestionar > Liberar espazo.
Ademais, introdúcense melloras nos game hubs, espazos dentro da consola que ofrecen información detallada sobre cada xogo: estatísticas, logros, amigos conectados, eventos e máis. Estes centros de información buscan facilitar o acceso á acción cun deseño centrado no botón de xogo.