Xa podemos descargar Angry Birds Transformers para iOS

A nova aposta de Rovio para continuar a explotar a franquía de Angry Birds continúa a avanzar, e hoxe estréase a nivel mundial, tras a súa pre-estrea en Finlandia e Nova Zelandia, o agardado Angry Birds Transformers, aplicación universal que podemos descargar de balde da App Store xa que adopta a fórmula do free-to-play, e que supón un importante cambio fronte ao resto de xogos da mesma marca, xa que fusiona aos paxaros anoxados cos robots Transformers nunha aventura con gráficos 3D que vén a ser un shooter no que se herdan elementos propios dos Angry Birds clásicos (para destruír aos Deceptiporcos poderemos destruír as estruturas ao seu redor apuntando aos seus puntos febles).

O xogo abre homenaxeando a serie de debuxos animados orixinal dos Transformers

Os Auotopaxaros fan uso de armas láser, pode transformarse en vehículos e, tras iniciar o seu combate cos Deceptiporcos decátanse que para salvar a Illa Porquiño dos Obots deberán unir forzas cos seus inimigos xurados, dándolle algo máis de variedade a un xogo que incluso aproveita certo efecto nostálxico abrindo cun vídeo no que homenaxean á primeira serie televisiva dos Transformers.
De todos os xeitos, o cambio de xénero dos Angry Birds non parece estar a ser moi ben recibida, e hai quen considera que esta franquía está en clara decadencia, estando destinada a perder a relevancia como xogos que parecen ser unha mera desculpa para manter a franquía viva de cara á comercialización de produtos de derivados.
Os usuarios de Android deberán agardar ao vindeiro 30 de outubro para poder descargar este novo xogo de Google Play.