Xa hai 2.242 firmas TIC galegas, 169 máis ca no período anterior
luns, 19 de outubro do 2015
Estas días fixéronse
públicos os
principais datos da Enquisa ás empresas TIC sobre a Sociedade da
Información en Galicia edición 2015, elaborada polo
observatorio OSIMGA (Axencia para a Modernización Tecnolóxica de
Galicia) co fin de amosar o estado de saúde actual do noso sector
das novas tecnoloxías dixitais. O informe ábrese poñéndonos en
situación: para quen non o saiba, a cifra de firmas galegas TIC está
arestora nas 2.242. En total, son 169 máis ca no período anterior
(2010-2013). Segundo salienta AMTEGA, estes números sitúan á nosa
terra “como a quinta Comunidade” en cuestión de tecido
empresarial TIC. Porén, a axencia tamén lembra que se ben o sector
galego ten moitas empresas integrantes, tamén é certo que “o
83,4% das firmas TIC galegas ten un máximo de dous empregados”.
No informe saliéntase
que o volume de negocio de todas elas superou os 2.396 millóns de
euros no ano 2014, “un 4,6% máis que no ano 2013”. A
investigación tamén engade que o 76,7% do volume de negocio
corresponde a clientes galegos e un 15,5% a clientes do resto de
España.
Explícase, asemade,
que o tecido tecnolóxico-dixital galego dá emprego a 14.400
traballadores, que representan o 1,6% das afiliacións á Seguridade
Social en Galicia (un 77,1% pertencen ao réxime xeral de cotización
da Seguridade Social, mentres que o 22,9% restante son traballadores
autónomos). No que atinxe ao “peso do sector na economía galega”,
o estudo do OSIMGA indica que o valor engadido bruto (VEB) do sector
TIC galego en 2013 superou os 1.021 millóns de euros, o que
representa o 1,9% do PIB de Galicia.
O estudo tamén
salienta a importante contribución do tecido tecnolóxico-dixital “á
creación dun ecosistema” que facilite o desenvolvemento de
produtos innovadores. Así, nos tres últimos anos, case un terzo das
firmas do sector foi quen de deseñar accións relacionadas con
Investigación e Desenvolvemento (I+D). Tres de cada catro destas
accións “obtivo resultados comercializábeis”.
Sobre a presenza da
muller, por desgraza aínda queda moito por traballar. Así, no
informe dise que a súa proporción é do 33,4% fronte ao 66,6% de
homes. “A análise da distribución por xénero das funcións dos
traballadores”, indícase na investigación de OSIMGA, “amosa
unha significativa fenda no persoal adicado especificamente a labores
TIC, cun 51,8% de traballadores homes, fronte ao 13,7% das
traballadoras que desempeñan tarefas TIC”.
Noutra
orde de cousas e en referencia á computación na nube, o
observatorio de AMTEGA comunica que o
39,6% das empresas TIC galegas emprega tecnoloxías cloud,
3,5 puntos porcentuais máis que na edición anterior. Desde o punto
de vista destes servizos
como liña de negocio, a enquisa sinala que o 44,9% das empresas do
sector que empregan
recursos na nube oferta tamén este tipo
de tecnoloxía.
No
que atinxe ás comunidades 2.0 e ao uso que lles dan as nosa firmas,
un 36,7% das empresas TIC galegas
ten presenza nas redes sociais, experimentando un incremento de 3,3
puntos porcentuais neste indicador. As
finalidades principais para ter presenza nas redes sociais son as
accións dirixidas a mercadotecnia
e a captación de novos clientes.
Outra
tendencia que se extrae do estudo do OSIMGA é o uso e o
desenvolvemento de software para plataformas móbiles: O 63,5% das
empresas TIC galegas empregou aplicacións para dispositivos, máis
de 7 puntos porcentuais respecto ao ano 2014.
No
que se refire ao desenvolvemento específico de software para
plataformas móbiles, unha de cada catro empresas TIC galegas ofrece
este tipo de servizos, aumentando esta porcentaxe ata o 32,1% no caso
das empresas adicadas ás actividades informáticas.
Por outra banda, tres
de cada catro empresas TIC galegas realizaron compras de bens ou
servizos a través do comercio electrónico, 4,4 puntos máis que no
ano anterior e un 27,3 vendeu bens ou servizos en liña durante o ano
2014. As vendas experimentaron un crecemento de 2 puntos porcentuais
respecto ao ano anterior.
Ademais, o informe
apunta a que o peso das vendas a través de comercio electrónico nas
empresas TIC galegas que venden a través da Rede foi dun 38,2%. “O
destino principal deste tipo de vendas é Galicia, como área
xeográfica cara a que se dirixen máis da metades das vendas, un
51,3%, seguido do 38,7% do resto de España”, engádese na
investigación.