Xa está dispoñíbel en galego a versión 3.4.1 do paquete ofimático LibreOffice

LibreOffice, a continuación da suite ofimática OpenOffice logo de que esta ficase estancada en mans de Oracle, continúa a bo ritmo, achegando novas versións, sumando apoios e demostrando que é posíbel ter unha ferramenta da máxima calidade con total independencia da influencia empresarial. Así nolo conta Antón Méixome, membro de The Document Foundation (a comunidade mundial que se encarga do desenvolvemento do LibreOffice), que informa de que está xa dispoñíbel a versión 3.4.1 da suite, o que constitúe a segunda versión estábel da familia 3.4, “enfocada a todos os individuos e as empresas”. Segundo engade Antón, a versión 3.4.1. soluciona varios defectos que lle afectan á versión anterior, e pode ser implantada con seguranza en produción por parte da maioría dos usuarios.
Para quen queira ir dándolle o máximo uso a este paquete, que como dixemos colle a testemuña e o espírito de OpenOffice para situalos na vangarda da Rede de hoxe, dicir que xa se pode descargar en galego dende a páxina web do equipo que representa á nosa terra en The Document Foundation.
Con todo, cómpre facer aclaracións. A nova versión presenta novidades importantes, pero a nivel de grandes empresas, aínda non foi usada, probada e avaliada de abondo como para ofrecer o mesmo nivel de garantías cá 3.3.3, empregada polo miúdo durante varios meses por milleiros de usuarios particulares de todo o mundo.
Neste senso, The Document Foundation, ao recoñecer as necesidades específicas de grandes empresas e usuarios conservadores, decidiu fornecer dúas versións diferentes do software, para satisfacer así tanto as necesidades de usuarios avanzados que buscan as novas funcionalidades como as de usuarios máis prudentes que prefiren a estabilidade antes cá dispoñibilidade de novas funcionalidades, informa o noso compañeiro Antón Méixome. E prosegue, ao fío destas aclaracións: “As versións anunciadas como estábeis poden implantarse con seguranza en entornos de traballo, aínda cando algúns dos posíbeis fallos poidan dificultar funcionalidades particulares mais non teñen impacto sobre a calidade total e a seguranza da produción de documentos”.