Wireless Laser Mouse 6000 para portátiles e ordenadores de sobremesa

martes, 8 de abril do 2008 Raquel Noya

Microsoft vén de lanzar en España o novo Wireless Laser Mouse 6000, un novo membro da “familia” de ratos sen fíos da compañía que pode satisfacer por igual tanto aos usuarios de portátil como de computadores de sobremesa. O desenvolvemento deste rato xurde da necesidade de resolver os problemas que se lles presentan aos usuarios de portátiles á hora de combinar comodidade e portabilidade nun só dispositivo, segundo apunta a empresa responsable. Decote, aqueles arranxaban o atranco dispoñendo de dous ratos: un de sobremesa e outro para ser transportado xunto ao seu laptop. Microsoft decidiu así crear o Wireless Laser Mouse 6000, un dispositivo que “satisface tanto as necesidades dos usuarios domésticos como as de aqueles que traballan fóra da casa todo o día”.
O deseño deste trebello combina un tamaño estándar cun receptor USB extraíble para facilitar o seu transporte que se oculta “elegantemente” na base do trebello.
Asemade, o Wireless Laser Mouse 6000 inclúe unha tecnoloxía sen fíos a través dun sistema de frecuencia de 2,4 GHz, que aporta beneficios tales como unha conexión fiable sen interferencias, toda a liberdade para o usuario sen cables e unha instalación doada xa que basta con conectar o rato para comezar a traballar con el.
Este dispositivo está dispoñible no mercado a un prezo de 49,90 euros.

PUBLICIDADE