Where’s My Water estrea a súa primeira secuela numérica

xoves, 12 de setembro do 2013 Marcus Fernández

Swampy, Allie e Cranky terán que resolver numerosos quebracabezas en Where’s My Water 2

A saga de xogos de Where’s My Water? de Disney converteuse en todo un fenómeno que levou á fábrica de soños a lanzar clónicos deste xogo nos que o simpático caimán Swampy era substituído por outros personaxes como Perry ou Mickey Mouse, pero agora os protagonistas orixinais están de volta e estrean hoxe a primeira secuela numérica do xogo orixinal, Where’s My Water 2, que ofrécese como título Free-to-Play, de xeito que podemos descargalo de balde incluíndo pagamentos dentro da aplicación para desbloquear certos elementos do xogo, como as melloras (aspiradora, gota e absorbedor) que fan máis doado superar as probas.
Esta nova aventura permítenos meternos na pel dos réptiles Swampy, Allie e Cranky, que terán que resolver numerosos quebracabezas, con novas mecánicas a través de máis de 100 niveis e desafíos (os mesmos niveis poden volver a xogarse dun xeito renovado), que principalmente consisten en trazar rutas para que se desprace a auga mollando uns parrulos e chegando ao seu obxectivo na cantidade suficiente.
O xogo saltará a novas plataformas en breve (xa está confirmado que terá versións para Windows e Windows Phone 8).

Os niveis do xogo terán mecánicas lixeiramente distintas


Trailer de lanzamento do xogo

ACTUALIZACIÓN (13-9-2013): A versión para Windows Phone 8 xa está dispoñible para a súa descarga.

PUBLICIDADE