WhatsApp limita a 5 os reenvíos simultáneos

Os díxomes transmitidos a través de WhatsApp están a converterse en todo un problema de escala global, favorecendo a desinformación que nalgúns casos chegou a provocar disturbios públicos e linchamentos, de aí que leven meses tomando medidas para evitar eses efectos, como etiquetar os contidos reenviados para deixar claro que non son da autoría do remitente, e limitar o número de conversas ás que pode reenviarse un contido, que no caso europeo era de só 20 destinatarios mentres que na India, o país onde a situación era xa alarmante, o límite fixábase en 5 destinatarios.
Vese que esta medida conseguiu resultados, e o límite imposto da India considerouse máis razoable, polo que agora a limitación de 5 conversas de destino para os reenvíos convértese na norma en WhatsApp, procurando así reducir as divulgacións masivas de contidos.
Os envíos masivos continúan a ser posibles, pero son máis traballosos, o que mitiga un problema que debería solucionarse de xeito cultural, pero que mentres iso non aconteza precisa de limitacións artificiais que contribúan a concienciar aos cidadáns sobre a mala práctica que supoñen as mensaxes en cadea.